بالی وڈ کے ’سدا بہار ہیرو‘ دھرمیندر 89 برس کی عمر میں چل بسے

بالی وڈ کے ’سدا بہار‘ اداکار دھرمیندر اپنی زندگی کی 90 ویں بہار دیکھنے سے قبل ہی اس دنیا سے رخصت ہو گئے ہیں۔

دلی کے صحافی یوسف تہامی کے مطابق اداکار سلمان خان، امیتابھ بچن اور دیگر اداکار ممبئی کے شمشان گھاٹ پہنچ گئے ہیں جہاں ان کی آخری رسومات ادا کی جائيں گی۔

انڈیا کے وزیر اعظم نریندر مودی نے دھرمیندر کی وفات پر افسوس کا اظہار کرتے ہوئے کہا ہے کہ ’دھرمیندر جی کا انتقال انڈین سنیما کے ایک عہد کے اختتام کی علامت ہے۔ وہ ایک ممتاز فلمی شخصیت تھے، ایسے بہترین اداکار جنہوں نے اپنے ہر کردار میں خوبصورتی، اثر اور گہرائی پیدا کی۔‘

ایکس پر جاری بیان میں ان کا مزید کہنا تھا کہ’دکھ کی اس گھڑی میں میری دعائیں اور ہمدردی ان کے خاندان، دوستوں اور لاتعداد چاہنے والوں کے ساتھ ہیں۔‘

رپورٹس کے مطابق دھرمیندر کچھ دن پہلے علالت کے باعث ہسپتال میں زیرِ علاج تھے۔ وہ سوگواران میں دو بیویوں پرکاش کور، ہیما مالنی اور چھ بچے چھوڑ گئے ہیں۔ ان کے بیٹے سنی دیول اور بوبی دیول بھی بالی وُڈ کے مشہور اداکار ہیں۔

دھرمیندر کی پیدائش آٹھ دسمبر 1935 کو لدھیانہ کے ایک گاؤں میں ہوئی۔ انہوں نے 1960 میں فلم ’دل بھی تیرا ہم بھی تیرے‘ سے اداکاری کا آغاز کیا۔ کئی فلموں میں انہوں نے رومانوی کردارادا کیے تاہم سنہ 1965 کی فلم ’حقیقت‘ سے انہیں پہچان ملی اور سنہ 1966 میں ’پھول اور پتھر‘ نے انہیں سپر سٹار بنا دیا۔

اس کے بعد کے برسوں میں انہوں نے ’شعلے‘، ’سیتا اور گیتا‘، ’میرا گاؤں میرا دیش‘، ’چپکے چپکے‘ اور کئی دوسری کامیاب فلموں میں کام کیا۔ بعد ازاں وہ ایکشن فلموں میں بھی بہت مشہور ہوئے اور انہیں ’انڈیا کا ہی مین‘ کہا جانے لگا۔

انہوں نے اپنے کیریئر کے آخری حصے میں سپورٹنگ رول بھی کیے جنہیں شائقین نے پسند کیا۔ انہوں نے اپنے بیٹوں کے ساتھ ’اپنے‘ اور ’یملا پگلا دیوانہ‘ جیسی فلموں میں بھی کام کیا۔ ان کی آخری فلم ’اکیس‘ آئندہ ماہ ریلیز ہوگی۔

دھرمیندر وہ واحد اداکار ہیں جو اپنی وجاہت کی بدولت بالی وڈ میں آئے اور تقریباً پانچ دہائیوں ہندی سینما پر راج کیا۔

اتنا ہی نہیں ہندی سینما کے سپریم سٹار کہے جانے والے دلیپ کمار جو اپنی سوانح حیات ’دلیپ کمار: دی سبسٹینس اینڈ دی شیڈو‘ میں خود اپنے پُرکشش ہونے کا دم بھرتے ہیں، تاہم انھوں نے کئی بار سرعام یہ بات کہی ہے کہ انھیں خدا سے یہ شکایت رہے گی کہ انھیں دھرمیندر سے زیادہ خوبصورت کیوں نہ بنایا۔

جبکہ دھرمیندر بھی ان سا بننا چاہتے تھے۔ انھوں نے سنہ 2017 میں اپنی ایک پرانی تصویر پوسٹ کرتے ہوئے لکھا تھا کہ ’نوکری کرتا، سائیکل پر آتا جاتا، فلمی پوسٹر میں اپنی جھلک دیکھتا، راتوں کو جاگتا، انوکھے خواب دیکھتا، صبح اٹھ کر آئینے سے پوچھتا کہ میں دلیپ کمار بن سکتا ہوں کیا؟‘

بات یہیں نہیں رکتی ہے بلکہ اس سے بھی دور جاتی ہے اور وہ یہ ہے کہ انڈین سینما کی ڈریم گرل ہیما مالنی جن کے دیوانوں میں جیتیندر، سنجیو کمار اور فیروز خان جیسے اداکار تھے وہ خود دھرمیندر کی دیوانی تھیں یہاں تک کہ انھوں نے پہلے سے شادی شدہ دھرمیندر سے شادی کی اور ان دونوں کی جوڑی انڈین فلم انڈسٹری کی اب تک کی سب سے کامیاب جوڑی ثابت ہوئی یہاں تک کہ ان دونوں نے دو درجن سے زائد فلمیں ایک ساتھ کی۔

دھرمیندر اپنی اداکاری سے زیادہ اپنے خلوص دل اور اپنے سلوک کے لیے جانے جاتے ہیں۔ یوں تو فلموں میں ان کی انٹری فلم فیئر کے ایک مقابلے کی مرہون منت ہے، لیکن انھیں فلموں کا شوق اپنے زمانے کے ہر دل عزیز اور پہلے میگا سٹار دلیپ کمار کی فلمیں دیکھ کر ہوا۔

دھرمیندر کے ساتھ ایک اہم بات یہ ہے کہ وہ راجیش کھنہ کے سٹارڈم کے زمانے میں واحد ایکٹر تھے جو انھیں ٹکر دے رہے تھے اور مالی طور پر ’آنکھیں‘، ’چرس‘، ’لوفر‘، ’آیا ساون جھوم کے‘ وغیرہ جیسی فلمیں دے رہے تھے۔

ان کی فلموں کو تین حصوں میں تقسیم کیا جا سکتا ہے۔ پہلی رومانٹک اور کمرشل ہٹ اور دوسری ایکشن اور کامیڈی فلمیں اور تیسری ناقدین کے نزدیک قابل ستائش فلمیں ہیں۔ انہوں نے چھ دہائیوں پر محیط اپنے شاندار کیریئر میں 300 سے زائد فلموں میں کام کیا۔

دھرمیندر کو 1997 میں فلم فیئر لائف ٹائم اچیومنٹ ایوارڈ اور 2012 میں پدم بھوشن ایوارڈ کے علاوہ اگرچہ کوئی اور قابل ذکر ایوارڈز نہیں ملے لیکن انھیں ایک لفظ میں بیان کیا جا سکتا ہے کہ وہ ’سدا بہار‘ ہیرو رہے ہیں۔

اس کے علاوہ وہ سنہ 2004 میں وہ بی جے پی کے ٹکٹ پر بیکانیر سے رکنِ پارلیمنٹ بھی منتخب ہوئے اور ایک مدت تک لوک سبھا (انڈین پارلیمنٹ) کے رکن رہے۔ انھیں شروع میں مینا کماری نے سنبھالا دیا تھا اور ان دونوں کے آفیئر کی باتیں ایک زمانے تک فلم انڈسٹری کا حصہ رہی ہیں۔

ہیما مالنی سے شادی

بالی وُڈ کی مشہور جوڑی ہیما مالنی اور دھرمیندر اُس وقت فلم انڈسٹری کے مشہور جوڑی بن گئے تھے جب انڈسٹری میں جوڑیوں کا کوئی خاص رواج نہ تھا۔

دھرمیندر نے پہلے پرکاش کور سے شادی کی تھی اور پرکاش سے ان کے چار بچے سنی دیول، بوبی دیول، وجیتا دیول اور اجیتا دیول تھے۔ اس کے بعد انہوں نے ہیما مالنی سے شادی کی اور ان کے ہاں دو بیٹیاں ایشا دیول اور آہانا دیول پیدا ہوئیں۔