سعودی کابینہ کا اجلاس آج، نئے مالی سال کے بجٹ پر بحث ہوگی

سعودی کابینہ کا ہفتہ وار اجلاس منگل 2 دسمبر کو ریاض میں ہو رہا ہے جس میس اہم ترین حکومتی امور اور رپوٹس کا جائزہ لیا جائے گا۔

ایس پی اے کے مطابق کابینہ آئندہ مالی سال کے لیے نئے بجٹ پر بحث کرے گی۔

یاد رہے اس سال یکم اکتوبر کو سعودی وزارتِ خزانہ نے مالی سال 2026 کے لیے بجٹ کے حوالے سے ابتدائی بیان جاری کیا تھا۔

بیان میں کہا گیا تھا کہ’ اخراجات کا تخمینہ 1313 ارب ریال اور آمدنی 1147 ارب ریال لگایا گیا ہے۔ بجٹ میں مجموعی قومی پیداوار کے مقابلے میں 3.3 فیصد خسارے کا اندازہ ہے۔‘

وزارت نے عندیہ دیا  تھا کہ سعودی وژن 2030 کے اہداف کے حصول کے لیے اخراجات کے حوالے سے پالیسی جاری رہے گی تاکہ سماجی اور معاشی ترجیحات کو پورا کیا جا سکے۔

ابتدائی تخمینے کے مطابق سال 2026 میں سعودی معیشت کی حقیقی مجموعی پیداوار میں 4.6 فیصد اضافہ متوقع ہے جوماسوائے تیل کے ذرائع میں ہونے والی بہتری سے ممکن ہو سکے گا۔

توقع ہے سال 2028 تک آمد بڑھ کر 1294 ارب ریال جبکہ اخراجات بھی 1419 ارب ریال تک پہنچ سکتے ہیں۔

بجٹ کے ابتدائی بیان میں کہا گیا تھا کہ تیل ماسوائے شعبوں کی کارکردگی اور حکومتی اقدامات کے باعث درمیانی مدت میں آمدنی میں بہتری ہو گی۔

گرچہ خسارہ برقرار رہنے کی توقع ہے تاہم اس کی شرح 2026 کے مقابلے میں کم ہو گی۔

حکومت کی توجہ معاشی اور سماجی فوائد دینے والے منصوبوں اور پروگراموں پر سرمایہ کاری جاری رہے گی۔

وزیر خزانہ محمد الجدعان کا کہنا ہے کہ’ سال 2026 کا بجٹ معیشت کو سہارا دینے اور مالیاتی استحکام کو یقینی بنانے کے نکتے کو مدنظر رکھتے ہوئے ترتیب دیا گیا ہے۔‘