امریکہ کی یونیورسٹی میں فائرنگ سے طالب علم ہلاک، ’ہال میں سالانہ امتحان چل رہا تھا‘

امریکہ کی ریاست کینٹکی میں ایک یونیورسٹی پر فائرنگ کے نتیجے میں ایک طالب علم ہلاک اور ایک شدید زخمی ہو گیا۔

امریکی نیوز چینل سی این این کے مطابق پولیس کا کہنا ہے واقعہ منگل کو فرینکفرٹ شہر کی سرکاری یونیورسٹی میں تین بج کر 10 منٹ پر اس وقت ہوا جب ایک ہال میں فائنل ایگزام چل رہا تھا۔

 یہ واقعہ سردیوں کی چھٹیوں سے چند روز قبل ہی پیش آیا ہے۔

یونیورسٹی کے ترجمان مائیکل ڈی کورے نے سی این این کو بتایا کہ پولیس نے مبینہ طور پر فائرنگ کرنے والے مشتبہ شخص کو گرفتار کرلیا اور اس کا کہنا ہے کہ وہ یونیورسٹی کا طالب علم نہیں ہے۔

ان کا یہ بھی کہنا تھا کہ بظاہر یہ واقعہ ٹارگٹڈ نہیں لگتا، تاہم مزید تحقیقات جاری ہیں۔

پولیس چیف سکاٹ ٹریسی نے نیوز کانفرنس میں کہا کہ پولیس نے فوری کارروائی کی اور فائرنگ کے چند لمحے بعد ہی مشتبہ شخص کو حراست میں لے لیا۔ اب کیمپس یا اردگرد کے لیے کوئی خطرہ موجود نہیں ہے۔

ان کے مطابق ’911 پر کال موصول ہوتے ہی پولیس اہلکار چار منٹ کے اندر جائے وقوعہ پر پہنچے۔

روئٹرز کے مطابق حراست میں لیے گئے شخص کا نام جیکب لی ہے اور اس کا تعلق انڈیانا سے ہے۔

پولیس کی جانب سے تحقیقات شروع کر دی گئی ہیں جبکہ ریاست کے گورنر نے واقعے کو ملزم کا ’انفرادی اقدام‘ قرار دیا ہے

فرینکفرٹ شہر لیگزنگٹن سے شمال مغرب کی طرف تقریباً 25 میل کی مسافت پر واقع ہے۔

یونیورسٹی کی ویب سائٹ پر دی گئی معلومات کے مطابق یہ 1886 میں قائم ہوئی اور اس میں دو ہزار 200 سے زائد طلبہ زیر تعلیم ہیں جبکہ ساڑھے چار سو سے زائد فیکلٹی اور سٹاف ممبرز بھی کام کرتے ہیں۔

یونیورسٹی کی انتظامیہ کا کہنا ہے کہ وہ طلبہ کی فیملیز کے ساتھ رابطے میں ہیں اور ان کو تمام اطلاعات اور سروسز فراہم کی جا رہی ہیں۔

یونیورسٹی کے صدر کوفی سی اکیکپو نے واقعے کو ایک ’بے حسی پر مبنی المیہ‘ قرار دیا۔

کینٹکی کے گورنر اینڈی بیشیئر کا کہنا تھا کہ میں اپنے بہادر سکیورٹی اداروں کا شکرگزار ہوں جن کے بروقت اقدام نے ہمارے لوگوں کی جانیں بچائیں۔

حالیہ مہنیوں کے دوران کسی تعلیمی ادارے میں فائرنگ کا تیسرا واقع ہے۔

اس سے قبل اکتوبر میں بھی دو ایسے واقعات پیش آئے۔

پہلے واقعے میں واشنگٹن ڈی سی کی ہاورڈ یونیورسٹی کیمپس کے قریب فائرنگ ہوئی تھی، جس کے نتیجے میں پانچ افراد زخمی ہوئے تھے تاہم ان میں سے کوئی بھی طالب عمل نہیں تھا۔

اس کے ایک روز پینسلوانیا کی یونیورسٹی میں فائرنگ کا واقعہ پیش آیا جس سے ایک شخص ہلاک اور چھ زخمی ہوئے تھے۔