امریکہ، قطر، ترکیہ اور مصر میامی میں عزہ معاہدہ پر بات چیت کریں گے
جمعرات 18 دسمبر 2025 20:37
وائٹ ہاؤس کے ایک عہدیدار نے جمعرات کو اے ایف پی کو بتایا کہ امریکی صدر ڈونلڈ ٹرمپ کے خصوصی ایلچی سٹیو وٹکوف جمعے کو میامی میں قطر، مصر اور ترکیہ کے اعلیٰ حکام کے ساتھ غزہ میں جنگ بندی معاہدے کے اگلے مرحلے پر بات چیت کریں گے۔
دوسرے مرحلے کے تحت اسرائیل کو غزہ میں اپنی پوزیشنوں سے انخلا کرنا ہے، حماس کے بجائے ایک عبوری اتھارٹی فلسطینی علاقے کا انتظام سنبھالے گی، اور غزہ میں بین الاقوامی استحکام فورس تعینات کی جائے گی۔
تاہم اکتوبر میں اسرائیل اور حماس کے درمیان ہونے والے معاہدے کے اگلے مرحلے کی جانب پیش رفت اب تک سست رہی ہے۔ یہ معاہدہ واشنگٹن اور اس کے علاقائی اتحادیوں کی ثالثی میں طے پایا تھا۔
ترکیہ نے کہا ہے کہ وزیر خارجہ حاقان فدان مذاکرات میں شرکت کریں گے۔ ایکزیوس نیوز آؤٹ لیٹ کے مطابق، قطری وزیر اعظم محمد بن عبدالرحمن آل ثانی اور مصری وزیر خارجہ بدر عبدالعاطی بھی مذاکرات میں موجود ہوں گے۔
ترک صدر رجب طیب اردوان نے بدھ کو ایک خطاب میں کہا کہ ’ترکیہ ہر محاذ پر پوری ثابت قدمی کے ساتھ جدوجہد جاری رکھے گا تاکہ غزہ میں جو کچھ ہو رہا ہے اسے فراموش نہ کیا جائے اور انصاف کو یقینی بنایا جا سکے۔‘
ایکزیوس کے مطابق، توقع ہے اسرائیلی وزیر اعظم بن یامین نیتن یاہو سے 29 دسمبر کو فلوریڈا میں صدر ٹرمپ کے ریزورٹ میں ان سے ملاقات کریں گے۔
امریکی صدر طویل المدتی معاہدے کے لیے دباؤ ڈال رہے ہیں۔
صدر ٹرمپ نے بدھ کو قوم سے ٹیلی وژن خطاب میں کہا کہ غزہ میں جنگ بندی نے مشرقِ وسطیٰ میں ’تین ہزار سال میں پہلی بار‘ امن قائم کیا ہے۔
تاہم جنگ بندی اب بھی نازک ہے اور دونوں فریق ایک دوسرے پر خلاف ورزیوں کا الزام عائد کر رہے ہیں، جبکہ ثالثوں کو خدشہ ہے کہ اسرائیل اور حماس دونوں وقت حاصل کرنے کی کوشش کر رہے ہیں۔
اسرائیل نے کہا ہے کہ اس نے گزشتہ ہفتے غزہ کی پٹی میں حماس کے عسکری ونگ کے اسلحہ سازی کے سربراہ کو نشانہ بنا کر ہلاک کر دیا، جس کے بارے میں اطلاعات ہیں کہ اس اقدام پر ٹرمپ نے جنگ بندی کو خطرے میں ڈالنے سے خبردار کیا تھا۔
سٹیو وٹکوف اور صدر ٹرمپ کے داماد جیرڈ کشنر نے اس سفارتی رابطہ کاری میں اہم کردار ادا کیا جس کے نتیجے میں غزہ جنگ کے خاتمے کا معاہدہ طے پایا۔
امریکی جوڑی روس کی یوکرین پر جارحیت کے خاتمے سے متعلق مذاکرات میں بھی شامل ہے اور وہ اختتامِ ہفتہ پر میامی میں روسی حکام سے ملاقات کریں گے۔
