اسرائیلی آباد کار یہودی ’حنوکا‘ کے چوتھے روز مسجد الاقصیٰ میں داخل، تلمودی کی رسم ادا کی

اسرائیلی آباد کار یہودی ’حنوکا‘ کے تہوار کے چوتھے روز بدھ کو مقبوضہ مشرقی بیت المقدس میں واقع مسجد الاقصیٰ کے صحن میں داخل ہوگئے۔
عرب نیوز کے مطابق آباد کاروں نے اسرائیلی فوجیوں کے ساتھ مسجد کے احاطے کا دورہ کیا جنہوں نے وہاں فلسطینیوں کی آمد روکنے کے لیے سخت پابندیاں عائد کر رکھی تھیں۔ 
وفا نیوز ایجنسی کے مطابق فلسطینی اتھارٹی سے منسلک یروشلم گورنریٹ نے اطلاع دی ہے کہ 689 آباد کاروں نے گروپوں کی صورت میں مسجد الاقصیٰ پر دھاوا بولا، اشتعال دلانے کے لیے اس کے صحن کا دورہ کیا اور وہاں تلمودی کی رسم بھی ادا کی۔
اسرائیلی فوج نے بدھ کو شمالی مغربی کنارے کے شہر نابلس میں ایک چھاپے کے دوران چار فلسطینیوں پر فائرنگ کردی۔ فلسطینی ہلال احمر کے مطابق ’یہ افراد سینے پر گولی، گھٹنے پر چوٹ، چَھرے اور سر میں ٹکڑے لگنے سے زخمی ہوئے۔‘
اسرائیلی فوجیوں نے نابلس میں عقبہ کے محلے کے ساتھ ساتھ راس العین، خان التکار اور الشہدا کے اردگرد کے علاقوں میں بھی چھاپے مارے۔
اس آپریشن کے دوران فلسطینیوں اور اسرائیلی فوجیوں کے درمیان جھڑپیں ہوئیں، اور اس دوران اسرائیلی کی فوج نے وہاں کے رہائشیوں کو گولیوں اور آنسو گیس کا براہ راست نشانہ بنایا۔