چُرائے گئے سات کتوں کا ’اسکیپ پلان‘ وائرل، دو روز بعد مالکان کے پاس پہنچ گئے

کسی کتے کا گم ہونے کے بعد کئی روز یا ہفتوں بعد گھر پہنچنا اب کچھ زیادہ حیرت کا باعث نہیں رہا مگر اب کے ایسے سات کتوں کا اسکیپ پلان سامنے آیا ہے جن کو چرانے کے بعد ایک ٹرک میں کہیں لے جایا رہا تھا۔

اس کے بعد جو کچھ ہوا وہ جانوروں سے متعلق کسی دلچسپ فلم سے کم نہیں، انٹرنیٹ پر ان کی ویڈیوز وائرل ہیں اور صارفین ان کے لیے کھلے دل سے جذبات کا اظہار کر رہے ہیں۔

انڈین ٹریبیون کی رپورٹ کے مطابق یہ واقعہ چین کے جیلینی کا ہے جس میں ایک گروہ نے مختلف گھروں سے مختلف کتے چرائے جن میں مختلف نسلوں کے کتے تھے، تاہم ان کو پلاننگ کرنے کا موقع اس وقت ملا جن انہیں ایک ٹرک میں ڈال کر لے جایا جا رہا تھا۔

 رپورٹ کے مطابق کتوں کو گوشت کی دکانوں پر بیچا جانا تھا کیونکہ چین میں کچھ لوگ کتوں کا گوشت کھاتے ہیں۔

اس گروپ میں ایک جرمن شیفرڈ، ایک گولڈن ریٹریور اور ایک کورگی کے علاوہ چند دوسرے کتے بھی تھے۔

یہ کتے رات کے وقت اس وقت لوگوں کی نظر میں آئے جب وہ چینگ شوانگ ایکسپریس ہائی وے پر رات کے وقت ایک منظم گروہ کی طرح چل رہے تھے۔

جن میں ایک ’لیڈر‘ بھی تھا اور سب سے آگے چل رہا تھا جبکہ سفر کے دوران وہ اس طرح سے ایک دوسرے کے قریب آتے جیسے مشورہ کر رہے ہوں۔

کچھ لوگوں نے ان کی ویڈیوز بنا کر سوشل میڈیا پر شیئر کیں جن میں کتوں کو گروپ کی شکل میں چلتے ہوئے دیکھا جا سکتا ہے اور ان کے قریب سے گاڑیاں گزر رہی ہیں۔

تاہم کچھ سفر کرنے والوں کو اس وقت حیرت ہوئی جب اگلے روز ان کو کئی کلومیٹر دور علاقے میں کھیتوں سے گزرتے ہوئے دیکھا گیا جس کا مطلب تھا کہ وہ کسی مخصوص مقام کی طرف جا رہے ہیں۔

کچھ لوگوں نے رک کر ان کو خوراک کا سامان دینے کی کوشش بھی کی تاہم وہ مسلسل چلتے رہے۔

جس کے بعد چین کے مقامی میڈیا کی بھی اس گروہ کے بارے میں دلچسپی پیدا ہوئی اور نہ صرف ان کے بارے میں خبریں نشر ہوئیں بلکہ اس امر کا سراغ بھی لگا لیا گیا کہ ان کو کتے چوری کرنے والے ایک گروہ نے مختلف گھروں کے باہر سے چوری کیا تھا اور کتے کسی نہ کسی طرح چلتی گاڑی سے کودنے میں کامیاب ہو گئے تھے۔

مقامی میڈیا کی رپورٹس کے مطابق کتوں نے دو راتوں میں تقریباً 17 کلومیٹر کا پیدل سفر کیا اور بالآخر اپنے اپنے گھروں تک پہنچنے میں کامیاب ہوئے۔

اس دوران بھی لوگ ان کی ویڈیوز بناتے رہے اور مالکان نے بھی ملنے کے بعد ان کی ویڈیوز سوشل میڈیا پر شیئر کیں۔

جن پر انٹرنیٹ صارفین تبصرے کر رہے ہیں۔

ایک ریسکیو والنٹیئر کا کہنا ہے کہ میڈیکل چیک اپ کے بعد معلوم ہوا ہے کہ کتوں کو معمولی چوٹیں لگی ہوئی تھین تاہم مجموعی طور پر وہ صحت مند ہیں۔