جازان میں ’کافی‘ کے باغات، سیاحوں کے لیے پسندیدہ مقام

جازان میں موجود کافی کے باغات اب سیاحتی مقامات کے طورپربھی مقبول ہو رہے ہیں۔ پہاڑی علاقے میں پھیلے ہوئے یہ باغات دیہی ترقی کا بنیاد ستون بھی مانے جاتے ہیں۔

سعودی خبررساں ایجنسی کے مطابق جازان میں پائے جانے والے کافی کے باغات میں آنے والے سیاحوں کو ایسے انٹرایکٹو تجربات فراہم کیے جاتے ہیں جن میں کافی کی کاشت کے طریقوں سے آگاہی، فصل کی کٹائی میں شرکت، اور روایتی انداز میں کافی کی تیاری کا مشاہدہ شامل ہے۔

یہ سب کچھ قدرتی حسن سے مالا مال ماحول، سیڑھی دار کھیتوں اور دلکش پہاڑی مناظر کے درمیان سیاحوں کی دلچسپی کا باعث ہوتے ہیں۔

متعلقہ اداروں کی جانب سے دیہی سیاحت کو فروغ دینے کے لیے جدید اور تخلیقی طریقے متعارف کرائے گئے ہیں، جن میں باغات کے اندر خصوصی راستوں کا قیام بھی شامل ہیں۔

یہاں آنے والے سیاح بیج کی کاشت سے لے کر کافی کا ذائقہ چکھنے تک کا مکمل سفر طے کرتے ہیں، اس کے علاوہ پینورامک مناظر اور دیہی طرزحیات کے مثالی تجربے سے بھی گزرتے ہیں ۔

ان اقدامات  کے تحت خصوصی تربیتی ورکشاپس کا انعقاد بھی کیا جاتا ہے، جہاں کافی کو بھوننے اور تیار کرنے کے فن سے بھی سیاحوں کو آگاہ کیا جاتا ہے۔ اس کے علاوہ باغات کی تاریخ، پیداوار اور دیگر معلومات بھی فراہم کی جاتی ہیں۔

وزارت ماحولیات، پانی و زراعت کے ریجنل دفتر کی جانب سے کسانوں اور متعلقہ اداروں کے اشتراک سے ماڈل باغات و فارمز کی ترقی، پیداوار اور سیاحتی استعداد میں اضافہ، جدید ٹیکنالوجی کے نفاذ ، کسانوں کی تربیت اور مصنوعات کے معیار میں بہتری جیسے اقدامات کیے ہیں جن کی وجہ سے کافی کے باغات معاشی اور ثقافتی و سیاحتی مرکز کے طورپر مزید پرکشش بن گئے ہیں۔

ریجن میں پائے جانے والے ان باغات سے وابستہ سماجی سرگرمیاں سیاحوں کے لیے ایک اضافی کشش کا باعث بن رہی ہیں، جو پہاڑی طرز زندگی اور مقامی ثقافت کو قریب سے دیکھنے کا موقع فراہم کرتی ہیں۔ یہ تمام عوامل مل کر زراعت اور سیاحت کے درمیان ایک مربوط نظام کی عکاسی کرتے ہیں۔

وزارت ماحولیات ، پانی وزراعت اور ’ریف السعودیہ‘ پروگرام کے اشتراک سے کیے جانے والے اقدامات کے تحت علاقے کی خصوصیات کو اجاگر کرنے پرتوجہ دی جاری ہے ، جو مملکت کے ویژن 2030 کے اہداف سے بھی ہم آہنگ ہے۔