وزیر خارجہ اسحاق ڈار کا 11 پاکستانی اور 20 ایرانی ملاحوں کی بحفاظت واپسی کے لیے سنگاپور سے رابطہ

پاکستان کے نائب وزیراعظم اور وزیرِ خارجہ اسحاق ڈار نے کہا ہے کہ انہوں نے سنگاپور کے حکام سے ان 11 پاکستانی اور 20 ایرانی ملاحوں کی بحفاظت واپسی کے لیے مدد طلب کی ہے جو اس وقت سنگاپور کی سمندری حدود کے قریب امریکی حکام کے قبضے میں موجود بحری جہازوں پر سوار ہیں۔

وزیر خارجہ نے جمعے کو سوشل میڈیا پلیٹ فارم ’ایکس‘ پر اپنے بیان میں بتایا کہ انہوں نے اس سلسلے میں اپنے سنگاپوری ہم منصب ویوین بالا کرشنن سے ٹیلیفونک رابطہ کیا ہے۔

واضح رہے کہ یہ ملاح ان بحری جہازوں پر موجود ہیں جنہیں امریکی حکام نے اپنی تحویل میں لے رکھا ہے۔ یہ جہاز اس وقت سنگاپور کی سمندری حدود کے قریب لنگر انداز ہیں۔

وزیرِ خارجہ کا کہنا تھا کہ ’سنگاپور سے درخواست کی گئی ہے کہ وہ ان ملاحوں کی فلاح و بہبود اور ان کی جلد از جلد وطن واپسی میں ممکنہ سہولت کاری فراہم کرے۔‘

اس سفارتی مشن کے سلسلے میں پاکستانی وزیرِ خارجہ نے ایرانی وزیرِ خارجہ عباس عراقچی سے بھی بات چیت کی ہے۔

انہوں نے کہا کہ دونوں ممالک اس حساس معاملے پر مسلسل رابطے میں ہیں۔ پاکستان نے ایران کو پیشکش کی ہے کہ وہ اپنے 20 ملاحوں کو پاکستان کے راستے ایران بھیجنے کے لیے تمام تر سفری سہولیات فراہم کرنے کے لیے تیار ہے۔

’ہم سنگاپور کے تعاون کو سراہتے ہیں۔ دفترِ خارجہ اور متعلقہ حکام امریکی حکام کے ساتھ بھی رابطے میں ہیں تاکہ اپنے شہریوں کی بحفاظت واپسی کو یقینی بنایا جا سکے۔‘

فی الحال یہ واضح نہیں ہے کہ امریکی حکام نے ان جہازوں کو کن الزامات کے تحت قبضے میں لیا ہے تاہم پاکستان کا کہنا ہے کہ اس کی اولین ترجیح اپنے شہریوں کی حفاظت اور ان کی واپسی ہے۔