’دعوت کے بغیر پہنچ جاتی ہیں‘، اداکارہ عالیہ بھٹ کی کانز فلم فیسٹیول میں شرکت متنازع کیوں؟

حال ہی میں بالی وڈ کی معروف اداکارہ عالیہ بھٹ نے فرانس میں مشہور ’کانز فلم فیسٹیول‘ نے دوسری مرتبہ شرکت کی۔

79 واں سالانہ کانز فلم فیسٹیول رواں ماہ کی 12 تاریخ کو شروع ہوا جو 23 مئی تک فرانس کے ساحلی علاقے فرنچ رویرا میں جاری رہے گا۔

’کانز فلم فیسٹیول‘ میں حسبِ روایت انڈیا کی چند شوبز شخصیات بھی شریک ہوئیں جس میں عالیہ بھٹ بھی شامل تھیں۔

ایونٹ کی افتتاحی تقریب میں عالیہ بھٹ نے پیچ پنک رنگ کا دلکش کاؤچر گاؤن زیب تن کیا، جسے کلاسک خوب صورتی اور رومانوی انداز کا حسین امتزاج قرار دیا جا رہا ہے۔

اداکارہ نے ریڈ کارپٹ پر واک کی اور فوٹوگرافروں کے سامنے پوز بھی دیے، تاہم وہاں انہیں ملنے والا ردِعمل سوشل میڈیا پر بحث کا موضوع بن گیا۔

کانز ریڈ کارپٹ پر کیا ہوا؟

سوشل میڈیا پر وائرل ویڈیوز میں دیکھا جا سکتا ہے کہ عالیہ بھٹ فوٹوگرافرز کی جانب ہاتھ ہلا رہی تھیں، لیکن کئی غیرملکی فوٹوگرافرز نے مبینہ طور پر انہیں نظر انداز کرتے ہوئے اپنے کیمرے نیچے کر لیے۔

اگرچہ چند فوٹوگرافرز نے تصاویر بنائیں، مگر مجموعی طور پر انہیں وہ توجہ نہ مل سکی جس کی توقع کی جا رہی تھی۔

ویڈیو میں عالیہ کو بعد میں مُڑ کر چند موبائل فونز اور کیمروں کی طرف پوز دیتے بھی دیکھا گیا۔ یہی لمحہ سوشل میڈیا پر وائرل ہوگیا اور ٹرولز نے اسے میمز کا موضوع بنا لیا۔

سوشل میڈیا پر مِلا جُلا ردعمل

انٹرنیٹ صارفین عالیہ بھٹ کے اس لمحے پر منقسم نظر آئے۔ کچھ افراد نے اداکارہ کو تنقید کا نشانہ بنایا، جبکہ کئی مداح ان کے دفاع میں بھی سامنے آئے۔

ایک صارف نے لکھا کہ ’یہ کافی شرمندہ کرنے والا منظر ہے۔ کانز ایک عالمی فلمی پلیٹ فارم ہے اور اس میں عالیہ بھٹ نے دوسری مرتبہ شرکت کی، لیکن وہاں شاید ہی کوئی انہیں جانتا ہو۔‘

ایک اور صارف نے ردِعمل دیتے ہوئے لکھا کہ ’بھلا اس بات سے کیا فرق پڑتا ہے کہ فوٹوگرافرز ان کی تصاویر لے رہے تھے یا نہیں؟ انہیں پھر بھی مدعو کیا گیا تھا اور انہوں نے پورے اعتماد کے ساتھ شرکت کی۔‘

محمد وسیم نے دعویٰ کیا کہ ’میں نے فرانس کے ایک فلم فیسٹیول میں انٹرن شپ کی ہے، یقین کریں وہاں لوگ شاہ رخ خان کو بھی نہیں جانتے، اِن اداکاروں کا تو کوئی چانس ہی نہیں۔ سچ یہ ہے کہ یہ لوگ خود پیسے دے کر وہاں آتے ہیں، انہیں تو کوئی باقاعدہ دعوت بھی نہیں دیتا۔‘

ایک صارف نے لکھا کہ ’اس سے زیادہ فوٹوگرافرز تو میرے ڈرائیور کی فوٹو لے رہے ہوتے ہیں جب وہ رینج روور پارک کرتا ہے۔ وہ خود کو مین کریکٹر سمجھ کر آئی تھی، مگر ہجوم نے کہا ’نیکسٹ‘۔‘

ادیتیا نے تبصرہ کرتے ہوئے لکھا کہ ’عالیہ بھٹ کانز کے ریڈ کارپٹ پر ہاتھ ہلا رہی تھیں اور فلائنگ کسز بھی دے رہی تھیں، مگر ایسا لگ رہا تھا کہ کسی فوٹوگرافر کو اُن کی تصاویر لینے میں خاص دلچسپی نہیں تھی۔‘