امریکہ کے ساتھ معاہدے کے فریم ورک کی ڈرافٹنگ کو حتمی شکل دے رہے ہیں: ایران

ایران کی وزارتِ خارجہ کے ترجمان اسماعیل بقائی نے ہفتے کے روز کہا ہے کہ تہران امریکہ کے ساتھ جنگ کے خاتمے کے لیے ایک معاہدے کے فریم ورک کی تیاری کے آخری مراحل میں ہے۔

خبر رساں ادارے اے ایف پی کے مطابق اسماعیل بقائی نے سرکاری نشریاتی ادارے سے گفتگو کرتے ہوئے کہا کہ ’معقول مدت یعنی 30 سے 60 دن کے اندر ان نکات کی تفصیلات پر بات چیت کی جائے گی اور بالآخر ایک حتمی معاہدہ طے پا جائے گا۔ اس وقت ہم مفاہمتی یادداشتوں کو حتمی شکل دینے کے عمل میں ہیں۔‘

ادھر ایران کے چیف مذاکرات کار محمد باقر قالیباف نے ہفتے کے روز خبردار کیا تھا کہ اگر واشنگٹن نے دوبارہ جنگ شروع کی تو اسے ’تباہ کن‘ جواب دیا جائے گا۔ یہ بیان ایسے وقت میں سامنے آیا ہے جب امریکی میڈیا میں ممکنہ نئے حملوں کی خبریں گردش کر رہی ہیں۔

دوسری جانب پاکستان کے بااثر آرمی چیف، جو 8 اپریل کی جنگ بندی کو معاہدے میں تبدیل کرنے کی سفارتی کوششوں میں کلیدی ثالث کے طور پر کردار ادا کر رہے ہیں، تہران میں ایرانی حکام سے مذاکرات کے بعد واپس روانہ ہو گئے۔

ایرانی حکام نے اس دوران امریکہ پر ’ضرورت سے زیادہ مطالبات‘ کرنے کا الزام بھی عائد کیا ہے۔