آبنائے ہرمز میں جہازوں پر حملہ کرنے والے دو ایرانی ڈرون تباہ کر دیے: امریکہ

امریکہ کی فوج نے کہا ہے کہ اس نے آبنائے ہرمز میں ایران کے دو ڈرونز کو مار گرایا ہے۔

فرانسیسی خبر رساں ادارے اے ایف پی کے مطابق فوج کی جانب سے یہ بھی کہا گیا ہے کہ سنیچر کو نشانہ بنائے جانے والے ڈرونز آبنائے ہرمز پر جہاز رانی کے لیے خطرہ بن رہے تھے۔

یہ واقعہ ایک ایسے وقت میں ہوا ہے جب متحارب قوتوں کے درمیان کشیدگی اور مشرق وسطیٰ کی جنگ میں اضافہ ہو رہا ہے۔

یو ایس سینٹرل کمانڈ کی جانب سے ایکس پر کی گئی ایک پوسٹ میں بتایا گیا ہے کہ ’مشرق وسطیٰ میں موجود امریکی فوجی نے دن کے اوائل میں دو ایرانی ڈرونز کو مار گرایا جو آبنائے ہرمز میں بین الاقوامی سمندری ٹریفک کے لیے خطرہ تھے۔‘

بیان میں یہ بھی کہا گیا ہے کہ امریکی افواج ایرانی جارحیت کے خلاف اور دفاع کے لیے پوزیشن برقرار رکھے ہوئے ہے اور یہ سلسلہ جاری رکھنے کو تیار ہیں۔

یونائیٹڈ سٹیٹس سینٹرل کمانڈ (سینٹ کام) نے جمعے کو رات گئے کہا تھا کہ آبنائے ہرمز کی طرف جانے چار ایرانی ڈرونز کو مار گرایا گیا جبکہ ایران کے ساحل کے قریب ریڈار کی سائٹس کو بھی نشانہ بنایا گیا۔

ایک دوسرے کی کارروائی کے جواب میں کیے گئے یہ حملے واشنگٹن اور تہران کے درمیان جاری ان بالواسطہ مذاکرات کے باوجود ہوئے ہیں جن کا مقصد ان خطوط کو تلاش کرنا ہے کہ جنگ کا خاتمہ کس طرح ہو سکتا ہے جبکہ حالیہ کارروائیوں میں ایران کی جانب سے امریکہ کے اتحادیوں بحرین اور کویت میزائل حملے بھی شامل ہیں۔