اوپیک پلس ممالک کا اجلاس، پیداوار کی ایڈجسٹمنٹ، آئل مارکیٹ کے استحکام کا عزم

اوپیک پلس کے سات رُکن ممالک سعودی عرب، روس، عراق، کویت، قازقستان، الجزائر اور عمان، جنہوں نے اپریل اور نومبر 2023 میں اضافی رضاکارانہ پیداوار کا اعلان کیا تھا، نے 5 جولائی کو عالمی مارکیٹ کے حالات اور آئندہ کے امکانات کا جائزہ لینے کے لیے ورچوئل اجلاس منعقد کیا۔

اوپیک پلس ممالک نے تیل کی مارکیٹ کے استحکام کے لیے اپنی مشترکہ وابستگی کے تحت اپریل 2023 میں اعلان کردہ اضافی رضاکارانہ ایڈجسٹمنٹ کے تحت پیداوار میں یومیہ ایک لاکھ 88 ہزار بیرل ایڈجسٹمنٹ کا فیصلہ کیا ہے۔

یہ ایڈجسٹمنٹ اگست 2026 میں نافذ العمل ہوگی۔ اپریل 2023 میں اعلان کردہ اضافی رضاکارانہ اقدامات کو مارکیٹ کی تبدیل ہوتی ہوئی صورتِ حال کے مطابق جزوی یا مکمل طور پر بتدریج واپس بھی لیا جا سکتا ہے۔

 تمام ممالک نے مارکیٹ کی صورتِ حال کی مسلسل نگرانی کرنے کے علاوہ اس کے مسلسل جائزے پر اتفاق کیا، انہوں نے استحکام برقرار رکھنے کی اپنی کوششوں کے تحت محتاط حکمتِ عملی اختیار کرنے اور مکمل لچک برقرار رکھنے کی اہمیت پر زور دیا۔

انہوں نے تعاون کے اعلامیے کی مکمل پاسداری کے عزم کا اعادہ کیا، جس میں اضافی رضاکارانہ پیداوار ایڈجسٹمنٹ شامل ہیں، جس کی نگرانی مشترکہ وزارتی مانیٹرنگ کمیٹی کرے گی۔

ان ممالک نے یہ تصدیق بھی کی کہ وہ جنوری 2024 کے بعد ہونے والی کسی بھی زائد پیداوار کی مکمل تلافی کریں گے۔

اوپیک پلس کے یہ ساتوں ممالک ہر ماہ اجلاس منعقد کریں گے تاکہ مارکیٹ کی صورتِ حال، معاہدے کی پابندی، اور تلافی کے عمل کا جائزہ لیا جا سکے۔ ان ممالک کا اگلا اجلاس 2 اگست 2026 کو ہوگا۔