جنوبی ناروے میں لگنے والی آگ میں 100 سے زیادہ گھر تباہ، سینکڑوں بے گھر

ناروے کے سرکاری نشریاتی ادارے اور پولیس نے کہا ہے کہ جنوبی ناروے میں جمعہ کے روزبڑے پیمانے پر لگنے والی آگ نے 100 سے زائد گھروں کو تباہ کر دیا جس کے باعث سینکڑوں شہری علاقہ خالی کرنے پر مجبور کر ہوگئے۔

پولیس کے مطابق آگ جمعے کی سہ پہر تقریباً ساڑھے تین بجے شہر ڈرامن کے ایک ٹاؤن ہاؤس سے شروع ہوئی۔ یہ بعدازاں تیزی سے پھیل کر قریبی علاقوں اور جنگلات تک جا پہنچی۔ ہفتہ کی صبح بھی فائر فائٹرز آگ پر قابو پانے کی کوششوں میں مصروف رہے۔

ناروے کے سرکاری نشریاتی ادارے این آر کے کے مطابق سینکڑوں افراد کو انخلا کے لیے قائم ایک مرکز (ایویکیوشن سینٹر) منتقل کیا گیا۔

پولیس کا کہنا ہے کہ کسی بھی رہائشی کے لاپتا ہونے کی اطلاع نہیں ملی۔ تاہم فوری طور پر آگ لگنے کی وجہ معلوم نہیں ہو سکی۔

ڈرامن شہر دارالحکومت اوسلو سے تقریباً 34 کلومیٹر (21 میل) جنوب مغرب میں واقع ہے۔