سعودی ریلوے کے معاہدے، 10 ٹرینیں اور 33 انجن خریدنے کا فیصلہ

سعودی ریلوے ’سار‘ نے جرمنی کے دارالحکومت برلن میں منعقدہ بین الاقوامی ٹرانسپورٹ ٹیکنالوجی نمائش ’اننوٹرانس 2026 ‘ کے دوران ریلوے نظام کو ترقی دینے کے لیے عالمی کمپنیوں کے ساتھ متعدد معاہدے اور مفاہمتی یادداشتوں پر دستخط کیے ہیں۔

ایس پی اے کے مطابق جرمنی میں ہونے والی بین الاقوامی نمائش میں ’سار‘ نے سوئس کمپنی اسٹیڈلر سے 10 نئی مسافر ٹرینیں خریدنے کے لیے مالی معاہدہ کیا، جس کے ساتھ ہی کمپنی سے طے شدہ مسافر ٹرینوں کی مجموعی تعداد 20 ہوگئی ہے۔

مال برداری کے شعبے میں امریکی کمپنی ’پروگریس ریل‘ سے 33 نئے انجن اور ’گرینبرئر‘ سے 782 نئی مال گاڑیاں خریدنے کے معاہدے کیے گئے، جبکہ فرانسیسی کمپنی سے فنی معاونت اور دیکھ بھال کی خدمات کا بھی معاہدہ کیا گیا۔

علاوہ ازیں ’ہٹاچی ریل‘ اور دیگر عالمی کمپنیوں کے ساتھ بھی متعدد معاہدے اور مفاہمتی یادداشتیں طے پائیں۔

مقامی صنعت کو فروغ دینے کے لیے ’استناد‘ کمپنی نے ٹیکنالوجی کی منتقلی اور سعودی عرب میں ریلوے بریک سسٹمز کے پرزہ جات کی تیاری و دیکھ بھال کو مقامی سطح پر کرنے کے لیے مفاہمتی یادداشت پر بھی دستختط کیے۔