Sorry, you need to enable JavaScript to visit this website.

ریاض: سعودی ولی عہد سے متحدہ عرب امارات کے نائب صدر کی ملاقات

سعودی عرب کے ولی عہد اور وزیراعظم شہزادہ محمد بن سلمان سے منگل کو ریاض میں متحدہ عرب امارات کے نائب صدر اور نائب وزیراعظم شیخ منصور بن زاید آل نہیان نے ملاقات کی۔
ایس پی اے کے مطابق شیخ منصور بن زاید نے امارات کے صدر شیخ محمد بن زاید آل نہیان کی جانب سے سعودی ولی عہد کو خیرسگالی کا پیغام پہنچایا۔
شہزادہ محمد بن سلمان نے بھی متحدہ عرب امارات کے صدر شیخ محمد بن زاید آل نہیان کے لیے نیک خواہشات کا اظہار کیا۔
دونوں رہنماؤں نے سعودی عرب اور متحدہ عرب امارات کے درمیان تعلقات کا جائزہ لیا اور خطے کی حالیہ صورتِ حال پر تبادلہ خیال کیا گیا۔
اس موقعے پر سعودی عرب کے وزیرِ دفاع شہزادہ خالد بن سلمان بھی موجود تھے۔
 یاد رہے کہ سعودی وزیر دفاع شہزادہ خالد بن سلمان نے متحدہ عرب امارات کے نائب صدر اور نائب وزیراعظم شیخ منصور بن زاید آل نہیان کو سعودی عرب کے دورے کی دعوت دی تھی۔
علاوہ ازیں سعودی وزیر دفاع شہزادہ خالد بن سلمان سے بھی امارات کے نائب صدر اور نائب وزیراعظم نے ملاقات کی جس میں دونوں ملکوں کے درمیان تعاون اور ہم آہنگی بڑھانے کے طریقوں کا جائزہ لیا گیا۔
دونوں رہنماؤں نے علاقائی اور بین الاقوامی صورتحال پر بھی تبادلہ خیال کیا۔

سعودی وزیر دفاع شہزادہ خالد بن سلمان سے بھی امارات کے نائب صدر اور نائب وزیراعظم نے ملاقات کی (فوٹو: ایس پی اے)

سعودی نائب وزیرِ خارجہ انجینیئر ولید بن عبدالکریم الخریجی، ایوانی شاہی کے مشیر خالد بن فرید حضراوی، وزیر دفاع کے مشیر برائے انٹیلی جنس امور ہشام بن عبدالعزیز بن سیف بھی موجود تھے۔
قبل ازیں امارات کے نائب صدر سعودی عرب کے ایک روزہ دورے پر ریاض پہنچے تو وزیر دفاع شہزادہ خالد بن سلمان نے کنگ خالد انٹرنیشنل ایئرپورٹ پر ان کا خیرمقدم کیا۔

امارات کے نائب صدر ایک روزہ دورے پر ریاض پہنچے تو سعودی وزیر دفاع  نے اُن کا خیرمقدم کیا (فوٹو: ایس پی اے)

امارات کے وفد میں سپریم نیشنل کونسل کے سیکریٹری جنرل علی بن حماد الشامسی، نیشنل ایمرجنسی کرائسز اینڈ ڈیزاسٹرمینجمنٹ اتھارٹی کے چیئرمین علی سعید النیادی اور ڈیفنس ایمپاورمنٹ بیلنس کونسل کے سیکریٹری جنرل ڈاکٹر ناصر بن حمد النعیمی شامل تھے۔

 

شیئر: