Sorry, you need to enable JavaScript to visit this website.

سعودی فضائی دفاعی نظام نے ریاض میں حوثیوں کا میزائل تباہ کر دیا، ایک زخمی

سول ڈیفنس کی ٹیموں نے ملبہ گرنے کے واقعے پر فوری کارروائی کی۔( فوٹو: ایس پی اے)
سعودی فضائی دفاعی نظام نے بدھ کو ریاض کی جانب حوثیوں کے داغے جانے والا ایک میزائل کو انٹرسیپٹ کرکے تباہ کر دیا۔
سول ڈیفنس کے مطابق اس کی ٹیموں نے انٹرسیپٹ کیے جانے والے میزائل کا ملبہ گرنے کے واقعے پر فوری کارروائی کی۔
یہ میزائل حوثی ملیشیا نے داغا تھا۔ اس کا ملبہ گرنے سے ایک عرب باشندہ زخمی ہوا جبکہ رہائشی عمارت اور گاڑی کو نقصان پہنچا۔ ایسے واقعات سے نمٹنے کے لیے معیاری طریقہ کار استعمال کیا گیا۔
یمن کی حکومت کی حمایت کرنے والے عرب اتحاد کے سرکاری ترجمان نے تصدیق کی کہ ریاض کو نشانہ بنانے والے ایک بیلسٹک میزائل کو انٹرسیپٹ کرکے تباہ کیا گیا ہے۔
اس سے قبل سعودی سول ڈیفنس نے نیشنل ارلی وارننگ پلیٹ فارم سے  ریاض اور الخرج کے لیے الرٹ جاری کیا بعد ازاں خطرہ ٹل جانے کا اعلان کیا تھا۔
 یاد رہے سعودی فضائی دفاعی نظام نے منگل اور بدھ کی صبح مملکت میں مختلف اہداف پر حوثی ملیشیا کی جانب سے داغے جانے والے کروز، بیلسٹک میزائلوں اور ڈرونز کو انٹرسیپٹ کرکے تباہ کیا
منگل کی رات ریاض میں اس وقت زور دار دھماکوں کی آوازیں سنی گئیں جب فضائی دفاعی نظام نے شہر کے اوپر موجود دشمن کے اہداف کو نشانہ بنایا۔
سول ڈیفنس کے مطابق ریاض میں انٹرسیپٹ کیے جانے والے دو میزائلوں کے ٹکڑے گرنے سے دو خواتین اور ایک بچے سمیت چار افراد زخمی ہوگئے جبکہ پندرہ گھروں کو جزوی نقصان پہنچا ہے۔
سول ڈیفنس نے گھروں کو پہنچنے والے نقصان کی تصاویر بھی جاری کیں۔
 عرب اتحاد نے منگل کو مختلف علاقوں میں چھ کروز، دو بیلسٹک میزائل اور پانچ ڈرونز مار گرائے۔
یمن کی حکومت کی حمایت کرنے والے عرب اتحاد کے سرکاری ترجمان نے بتایا ریاض اور جنوبی ریجن میں چار کروز میزائلوں اور تین ڈرونز کو انٹرسیپٹ کرکے تباہ کر دیا گیا۔ ظہران اور حرص کی جانب داغے گئے بیلسٹک میزائلوں کو بھی روکا گیا جبکہ ریاض کے شمال میں تین ڈرونز کو تباہ کیا گیا۔
 وزارت توانائی کے ایک سرکاری ذریعے نے بتایا الشرقیہ ریجن کے شہر ظہران میں آرامکو کی ایک انتظامی عمارت کو نشانہ بنایا گیا جس سے معمولی نوعیت کی آگ لگی۔
ذرائع نے کہا کہ متعلقہ حکام نے واقعے پر فوری کارروائی کی اور ضروری اقدامات کیے۔ کوئی جانی نقصان نہیں ہوا۔

 

شیئر: