انوشکا شرما کی کون سی فلم کوہلی کو زیادہ پسند؟

’اے دل ہے مشکل‘ 2016 میں دیوالی کے موقعے پر ریلیز ہوئی تھی (فوٹو: اے ایف پی)
بالی وڈ اداکارہ انوشکا شرما کے لاکھوں مداحوں میں انڈین کرکٹ ٹیم کے کپتان اور انوشکا کے شوہر ویراٹ کوہلی بھی شامل ہیں۔
اخبار ’انڈیا ٹو ڈے‘ کے ساتھ اپنے ایک حالیہ انٹرویو میں کرکٹ لیجنڈ ویراٹ کوہلی نے انوشکا کی فلموں میں سے اپنی پسندیدہ ترین فلم کے بارے میں بتایا ہے۔
کوہلی کے مطابق ’اے دل ہے مشکل‘ انوشکا کی فلموں میں سے ان کی پسندیدہ ترین فلم ہے۔
 
ان کے مطابق اس فلم میں انوشکا کا کردار (علیزے خان) ہمیشہ یاد رہنے والا کردار ہے اور وہ (کوہلی) اب بھی وقتاً فوقتاً اس کے مختلف مناظر یوٹیوپ پر دیکھتے رہتے ہیں۔
انڈین کپتان کا کہنا ہے کہ ’اگر انوشکا کی فلموں میں سے میری پسندیدہ ترین فلم کی بات کی جائے تو میں آرام سے ’اے دل ہے مشکل‘ کا انتخاب کروں گا۔ اس فلم میں انوشکا کا کردار ہمیشہ کے لیے میرا پسندیدہ ترین رہے گا۔‘ 
ان کا مزید کہنا ہے کہ ’میرا مطلب ہے کہ میں اب بھی اکثر انوشکا کو بتاتا ہوں۔ بعض دفعہ میں ان کے ساتھ بیٹھ جاتا ہوں اور یوٹیوب کھول کر فلم کے وہ مناظر دیکھتا ہوں جن میں انوشکا کو کینسر ہو جاتا ہے اور اس سین کو جب رنبیر واپس آ جاتا ہے۔ وہ گانا میرے دل میں بسا ہوا ہے اور یہ کبھی بھی میرے دل سے محو نہیں ہوگا۔‘
’اے دل ہے مشکل‘ میں رنبیر کپور اور انوشکا شرما نے مرکزی کردار ادا کیا تھا۔ فلم میں ایشوریا رائے بچن نے بھی اپنی اداکاری کے جوہر دکھائے تھے۔

’اے دل ہے مشکل‘ میں رنبیر کپور اور انوشکا شرما نے مرکزی کردار ادا کیا تھا (فوٹو: ٹوئٹر)

فلم کے پروڈیوسر کرن جوہر تھے اور فلم کی کہانی بھی انہوں نے ہی لکھی تھی۔ ’اے دل ہے مشکل‘ 28 اکتوبر 2016ء کو دیوالی کے موقعے پر ریلیز ہوئی تھی۔
باکس آفس پر یہ فلم ہٹ ہو گئی تھی اور اس نے 237 کروڑ روپے سے زائد کا بزنس کیا تھا۔
 

شیئر: