کراچی اور گھوٹکی میں رینجرز اہلکاروں سمیت چار ہلاک

پاکستان کے ساحلی شہر کراچی میں وفاقی حکومت کے غریبوں کی امداد کے لیے شروع کیے گئے ’احساس پروگرام‘ کے دفتر پر کریکر حملے میں ایک شخص ہلاک اور رینجرز اہلکار سمیت آٹھ افراد زخمی ہو گئے ہیں۔ دوسری جانب اندرون سندھ گھوٹکی میں رینجرز کی گاڑی پر حملے میں دو  اہلکاروں سمیت تین افراد ہلاک ہو گئے ہیں۔ 

اردو نیوز کے نامہ نگار توصیف رضی ملک کے مطابق جمعے کو کراچی میں ہونے والے حملے کے بارے میں پولیس کی جانب سے بتایا گیا ہے کہ بم دھماکہ لیاقت آباد نمبر 10 کے علاقے میں ریاض گورنمنٹ کالج میں قائم احساس پروگرام کے دفتر کے باہر سکیورٹی پر تعینات قانون نافذ کرنے والے اداروں کی گاڑی کے قریب ہوا۔ 

ایس ایس پی عارف اسلم راؤ کے مطابق ہلاک ہونے والے نوجوان کی شناخت کاشف کے نام سے ہوئی ہے جو ناظم آباد کا رہائشی تھا، حادثے میں زخمی ہونے والے افراد کو عباسی شہید ہسپتال منتقل کیا گیا ہے۔

پولیس ترجمان کے مطابق حادثے میں  زخمی ہونے والے افراد کی شناخت 26 سالہ سلیم، 40 سالہ روشن علی، 29 سالہ ذیشان، 28 سالہ فیضان، 50 سالہ نارائن اور 52 سالہ حشمت کے نام سے ہوئی ہے۔

دوسری جانب اندرون سندھ گھوٹکی شہر کی گھوٹا مارکیٹ میں رینجرز موبائل کے قریب بم دھماکہ ہوا جس میں دو رینجرز اہلکار اور ایک راہگیر ہلاک ہوا۔

ایس ایس پی گھوٹکی ڈاکٹر فرخ علی کے مطابق ہلاک ہونے والے رینجرز اہلکاروں کی شناخت ظہور احمد اور فیاض احمد کے نام سے ہوئی، جبکہ راہگیر کی شناخت غلام مصطفیٰ بھیو کے نام سے ہوئی جو ریلوے کا ملازم بتایا جا رہا ہے۔

ڈاکٹر فرخ کا کہنا تھا کہ سکھر سے بم سپوزل ٹیم بلوائی ہے اس کے بعد پتا چلے گا کہ دھماکہ کس نوعیت کا تھا۔

اس سے پہلے گذشتہ ہفتے بھی کراچی میں رینجرز موبائل پر کریکر حملہ ہو چکا ہے جس میں کوئی جانی نقصان نہیں ہوا تھا تاہم رینجرز موبائل کو جزوی نقصان پہنچا تھا۔