زیورات سے بھرا بیگ مالک تک پہنچا دیا

سعودی عرب میں سکیورٹی اہلکار نے ایمانداری کا ثبوت دیتے ہوئے سونے کے زیورات سے بھر بیگ مالک تک پہنچا دیا۔ زیورات سے بھرا بیگ سڑک کے کنارے ڈیوٹی پر موجود اہلکار کو ملا تھا۔

ویب نیوز ’سبق ‘ کے مطابق ’بلقرن‘ کمشنری کے شہر ’سبت العلایہ‘ میں پیٹرولنگ کے دوران پولیس اہلکار کو سڑک کے کنارے سیاہ رنگ کا بیگ دکھائی دیا جس پر اہلکار نے فوری طور پر تھانے کومطلع کیا۔

علاقے کے تھانے سے تفتیشی ٹیم موقع پر پہنچ گئی جنہوں نے بیگ تحویل میں لے کر اسے کھولا تو اس میں کپڑے اور سونے کے زیوارت برآمد ہوئے۔

بیگ میں اس کے مالک کا ٹیلی فون نمبر اور ایڈرس بھی برآمد ہوا جس پر بیگ کے مالک سے رابطہ کرکے اس بارے میں اطلاع دی گئی۔

پولیس کی کال موصول ہوتے ہی بیگ کے مالک فوری طور پر تھانے پہنچ گئے جنہوں نے بتایا کہ سفر کے دوران ان کا بیگ گرگیا تھا جس کی انہیں تلاش تھی۔