’ملک میں خود کو محفوظ نہیں سمجھتی‘

لاہور میں موٹروے پر گینگ ریپ کے واقعے اور اس پر سی سی پی او لاہور کی جانب سے اپنائے جانے والے موقف پر شوبز شخصیات سمیت دیگر شعبوں سے وابستہ افراد شدید ردعمل کا اظہار کر رہے ہیں۔

اداکارہ عائشہ عمر نے اپنی ٹویٹ میں ان لوگوں کے سامنے چند سوالات رکھے جو اکیلے خواتین کے گھر سے نکلنے کے خلاف ہیں۔ انہوں نے لکھا ’اگر کسی خاتون کو ایمرجنسی میں رات کے وقت نکلنا پڑے تو، اگر اس کے گھر میں کوئی بیمار ہو جائے اور طبی امداد کی ضرورت ہو. میں دنیا کے کسی بھی حصے میں رات کے ایک بجے گلیوں میں پھرتے ہوئے خود کو محفوظ سمجھتی ہوں لیکن اپنے ملک میں نہیں، حتیٰ کے کار کہ اندر بھی‘

اداکارہ مہوش حیات نے سی سی پی او کے اس بیان کہ خاتون کو دوسرے روٹ سے جانا چاہیے تھا، کے جواب میں لکھا۔۔۔۔۔۔  ’سنگاپور میں کیسے ایک عورتیں رات کو چار بجے گھروں سے باہر نکلتی ہیں، ہمیں تحفظ کا احساس یہاں کیوں نہیں؟ ہم کسی مہذب معاشرے یا پھر جنگل میں رہتے ہیں؟ ریپسٹس کو سرے عام پھانسی دینے کے لیے جتنا مرضی شور مچائیں جب تک مائنڈ سیٹ تبدیل نہیں ہو گا کچھ نہیں بدلے گا‘

مہوش اعجاز نے مہوش حیات کے نکتے کی حمایت کرتے ہوئے لکھا ’آپ نے بالکل ٹھیک کہا، جب تک ہم اپنا مائنڈ تبدیل نہیں کریں گے، کچھ نہیں بدلے گا‘

اداکار اعجاز اسلم نے عمران خان سے ملزموں کو سرے عام پھانسی دینے کا مطالبہ کرتے ہوئے لکھا ’آپ کو ایک مثال تو قائم کرنا پڑے گی‘

اینکر ثنا بُچہ نے انتظامیہ کو طنز کا نشانہ بناتے ہوئے لکھا ’موٹر وے حکام اپنی حدود کا تعین کرتے رہے اور اس دوران کسی حوا کی بیٹی کی عزت کی حدود پار کی گئیں اور ملزم تو انسانیت سے ہی گزر گئے.‘

اداکار فیضان شیخ نے ریپ کرنے والوں کو سرے عام پھانسی دینے کا مطالبہ کرتے ہوئے لکھا ’قیامت خود بتائے گی، قیامت کیوں ضروری تھی۔‘

اداکار حمزہ علی عباسی نے اپنے جذبات کا اظہار کرتے ہوئے لکھا ’بیماری بڑھتی جا رہی ہے، انسانیت بیمار ہے، مجھے نہیں پتہ کہ میں اس کا اس دنیا میں علاج کر پاؤں گا یا نہیں، لیکن مجھے اتنا معلوم ہے کہ بہت جلد سب کو اپنے اعمال کا حساب دینا ہوگا جب ہم سب کو بنانے والا انصاف کرے گا‘ 

اداکار اور ہدایت کار شان شاہد نے ’موٹر وے انسیڈنٹ‘ اور ’جسٹس فار مروہ‘ کے ہیش ٹیگ استعمال کرتے ہوئے ٹویٹ میں لکھا ’منصف خاموش ہیں اور سائل منتظر، زندگی طاقت وروں اور کمزوروں کے درمیان ٹرائل ہے،  جو آج خاموش کھڑے ہیں ان کا فیصلہ خدا کی عدالت میں ہو گا۔‘

اداکارہ وینا ملک نے ان لوگوں پر حیرت کا اظہار کیا جو ریپ کرنے والوں کو سرے عام پھانسی دینے کے حق میں نہیں اور لکھا ’وقت آ گیا کہ اب ایسا کیا جائے۔‘

انہوں نے وزیر اعظم عمران خان کو مخاطب کرتے ہوئے یہ بھی لکھا ’قوم آپ کی طرف دیکھ رہی ہے کہ اب آپ یہ کر گزریں۔‘

اداکارہ اور کمپیئر صنم بلوچ نے بھی زیادتی کرنے والوں کو سرے عام پھانسی دینے کا مطالبہ کیا۔ صحافی اور اینکر غریدہ فاروقی نے سی سی پی او لاہور کے انٹرویو کی مختلف ویڈیو کلپنگز شیئر کیں اور ساتھ کیشن لگایا ’مرد کے ساتھ باہر جائیں، مرد نہ ہوتو کسی بچے کے ساتھ باہر جائیں اگر وہ بھی نہیں تو گھر میں چپ کر کے سو جائیں ۔۔۔۔ سی سی پی او لاہور عمر شیخ کی انوکھی باتیں۔‘

خیال رہے گینگ ریپ کا واقعہ لاہور سیالکوٹ موٹروے پر پیش آیا، خاتون بچوں سمیت گاڑی میں گوجرانوالہ جا رہی تھیں اور پٹرول ختم ہونے پر گاڑی روکی تو ملزموں نے حملہ کر دیا تھا۔