انڈیا:’کچی آبادی کی شہزادی‘ اور ’ہاتھیوں کی ٹیکس وصولی‘

کہتے ہیں قسمت جب اچھی ہوتی ہے تو آپ مٹی کو چھو لیں تو وہ سونا بن جائے اور جب بری ہوتی ہے تو اونٹ پر بیٹھے آدمی کو بھی کتا کاٹ لے۔ انڈیا کی مشرقی ریاست مغربی بنگال میں ایک ماہی گیر خاتون راتوں رات مالا مال ہو گئیں۔

فری پریس جرنل کی خبر کے مطابق مغربی بنگال کے ضلع 24 پرگنہ میں سندر بن کے جزائر والے علاقے میں ایک معمر خاتون پشپا نے 52 کلو کی ایک مچھلی پکڑی۔

پشپا کی پکڑی گئی مچھلی چھ ہزار 200 روپے فی کلو فروخت ہوئی اور انہیں اس سے تین لاکھ انڈین روپے سے زیادہ کی آمدنی ہوئی جو پاکستانی روپے میں تقریباً چھ لاکھ ہے۔

کہا جاتا ہے کہ یہ مچھلی کسی سمندری جہاز سے ٹکرا کر مر گئی تھی اور جوں ہی پشپا کی اس پر نظر پڑی وہ اس کو حاصل کرنے کے لیے دریا میں کود پڑیں۔ مقامی لوگوں نے اس مچھلی کو ساحل تک لانے میں پشپا کی مدد کی۔

اس مچھلی کو مقامی زبان میں 'بھولا' مچھلی کہا جاتا ہے۔

کہتے ہیں کہ اگر مچھلی خراب نہ ہونے لگتی تو اس کی اور زیادہ قیمت ملتی۔ اس مچھلی کی چربی شمال مشرقی ایشیائی ممالک کو برآمد کی جاتی ہے۔ کھانے میں کم استعمال ہوتی ہے لیکن اس کے طبی فوائد بہت ہیں۔

جب قسمت کھلنے کی ہی بات ہے تو ان دنوں مہاراشٹر کے دارالحکومت ممبئی کی کچی آبادی میں رہنے والی ایک 12 سالہ لڑکی انسٹا گرام پر تیزی سے سٹار بن رہی ہیں۔

ملیشا کھاروا ممبئی میں سمندر کے کنارے آباد کچی آبادی میں رہتی ہیں۔ ان کی شہرت کی وجہ ہالی وڈ کے اداکار رابرٹ ہوفمین ہیں۔

رابرٹ ہوفمین امسال فروری میں ایک میوزک ویڈیو کے لیے انڈیا کے دورے پر آئے تھے جہاں ان کی ملاقات ملیشا سے ہوئی۔

این ڈی ٹی وی کے مطابق ملیشا چائلڈ ماڈل بننا چاہتی ہیں اور اس کام میں ہوفمین ان کی مدد کر رہے ہیں۔

ہوفمین کے ساتھ ملیشیا کی کئی ویڈیوز وائرل ہوئی ہیں اور لوگ انسٹا گرام پر بڑی تیزی سے ان کو فالو کر رہے ہیں۔ ہوفمین اس لڑکی کے خواب کی تکمیل کے لیے گوفنڈ می ڈاٹ کام کے تحت ایک مہم چلا رہے ہیں۔

ملیشا نے ہوفمین کے ساتھ اپنی ایک ویڈیو بھی شیئر کی ہے جس میں وہ انہیں ہندی سکھا رہی ہے اور ملیشا کے گھر میں موجود بچے رابرٹ ہوفمین کی زبان اور لہجے پر خوب ہنستے ہیں۔

لوگ ہوفمین اور بچی دونوں کی تعریف کر رہے ہیں۔ کچھ لوگوں نے ملیشا کو 'کچی آبادی کی شہزادی' کہا ہے۔

کہتے ہیں کہ جب قسمت خراب ہو تو راستے میں ہاتھی کا جھنڈ آپ کا راستہ روک لیتا ہے یا پھر سانڈ آ جاتا ہے۔ محکمۂ جنگلات کے ایک افسر نے ہاتھیوں کے جھنڈ کے ایک ٹرک کو روکنے اور اس سے گنا نکال کر کھانے کی ویڈیو شیئر کی ہے۔

ویڈیو میں دیکھا جا سکتا ہے کہ ہاتھی ہتھنی اور اس کے دو بچے ٹرک کے سامنے کھڑے ہیں اور ہاتھی ٹرک سے گنا نکال کر سڑک پر ڈالتا ہے اور اس کے کنبے کے باقی لوگ گنا کھاتے ہیں جبکہ ٹرک کے اندر سے ایک شخص یہ ویڈیو ریکارڈ کر رہا تھا۔

انہوں نے اس کے ساتھ لکھا ہے کہ 'جنوبی ہندوستان میں ہاتھی کا جھنڈ گنے کا ٹیکس وصول کرتے ہوئے۔'

کئی لوگوں نے اسے لوٹ سے بھی تعبیر کیا ہے۔

اسی طرح دادی پوتے کی ایک ویڈیو بھی ان دنوں وائرل ہوئی ہے۔ اس میں ايک گلی میں ایک معمر خاتون کو ایک بپھرا ہوا سانڈ نشانہ بناتا ہے۔

انڈین میڈیا کے مطابق دادی کو گرتا دیکھ کر ان کا پوتا دوڑ کر انہیں  بچانے آتا ہے لیکن سانڈ اسے بھی نہیں چھوڑتا۔ لڑکا کسی طرح دادی کو بچانے کی کوشش کرتا ہے لیکن پھر سانڈ دونوں کو سینگوں سے گرا دیتا ہے۔

اس ویڈیو کو دیکھ کر جہاں لوگ لڑکے کی بہادری کی تعریف کر رہے ہیں وہیں دادی پوتے کے رشتے پر بھی باتیں کر رہے ہیں۔

ہندوستان ٹائمز کی خبر کے مطابق یہ واقعہ 28 ستمبر کو دہلی سے ملحقہ ریاست ہریانہ کے مہیندر گڑھ علاقے میں پیش آیا۔ رپورٹ کے مطابق لڑکے نے اپنی دادی کو بچا لیا لیکن دونوں زخمی ہو گئے ہیں۔ سانڈ کے حملے میں تین دیگر افراد زخمی ہوئے۔