Sorry, you need to enable JavaScript to visit this website.

لیمبرگینی کی 45 لاکھ روپے میں رجسٹریشن

لیمبرگینی کار 45 لاکھ 32 ہزار روپے میں رجسٹر کی گئی ہے (فوٹو: انسپلیش)
پاکستان کے صوبہ پنجاب کے محکمہ ایکسائز نے بالآخر لیمبرگینی کار کی رجسٹریشن کر لی ہے جو اس سے پہلے سسٹم میں سہولت نہ ہونے کی وجہ سے ممکن نہ ہو سکی تھی۔ 
پنجاب کے محکمہ ایکسائز نے سسٹم میں سہولت نہ ہونے کی وجہ سے لیمبرگینی کار کا نمبر جاری کرنے سے انکار کر دیا گیا تھا۔ 
ڈی ایچ اے میں ایکسائز کی موٹر رجسٹریشن برانچ کے سربراہ ندیم چوہدری نے اردو نیوز کو بتایا کہ سسٹم کو اپ گریڈ کر دیا گیا ہے اور رولز میں بھی ترمیم کر دی گئی ہے۔
یاد رہے کہ گذشتہ ہفتے پنجاب کے دارالحکومت لاہور کے ایک رہائشی نے 12 کروڑ روپے مالیت کی کار کی رجسٹریشن کروانے کے لیے محکمہ ایکسائز سے رابطہ کیا تھا، تاہم سسٹم میں 10 کروڑ روپے مالیت سے زائد کی گاڑی رجسٹر کرنے کی اہلیت نہ ہونے کی وجہ سے ان کو فائل واپس کر دی گئی تھی۔
موٹر رجسٹریشن برانچ کے سربراہ ندیم چوہدری نے بتایا کہ ’پنجاب انفارمیشن اینڈ ٹیکنالوجی بورڈ نے بھی ایکسائز ڈیپارٹمنٹ کا سافٹ ویئر اپ گریڈ کر دیا ہے، جس کے بعد اس کار کو رجسٹر کرنے کی سہولت ہوئی۔‘
انہوں نے بتایا کہ سسٹم میں ترمیم کے فوری بعد ہی گاڑی کے مالک کو بلا کر نمبر الاٹ کر دیا گیا ہے۔
محکمہ ایکسائز کے اعلیٰ افسر ندیم چوہدری کے مطابق ’گاڑی کے مالک سے 45 لاکھ 32 ہزار روپے ٹیکس اور نمبر الاٹمنٹ کی غرض سے چارج کیے گئے ہیں۔‘

لیمبرگینی سے پہلے رجسٹر ہونے والی سب مہنگی گاڑی جی ٹی مرسیڈیز تھی (فوٹو: انسپلیش)

انہوں  نے بتایا کہ ’یہ کار پنجاب کی مہنگی ترین کار بن گئی ہے، نہ تو اس سے پہلے اس مالیت کی کار رجسٹر ہوئی نہ اس پر اتنا ٹیکس کٹا۔‘
لیمبرگینی کے مالک کا تعلق لاہور کے ایک کاروباری خاندان سے ہے اور لیمبرگینی کار ان کے والد نے انہیں سالگرہ پر تحفے میں دی ہے۔
اس سے قبل اردو نیوز سے بات کرتے ہوئے انہوں نے بتایا تھا کہ ’اس کار کو پاکستان میں لانے کے لیے میرے والد نے کروڑوں روپے کسٹم بھی بھرا ہے اور میں حیران ہوں کہ ایسی کار کی رجسٹریشن کا پاکستان میں کوئی نظام موجود نہیں۔ دس دن سے ایکسائز کے دفتر کے چکر لگا رہا ہوں اب مجھے فائل ہی واپس کر دی گئی ہے۔ اب میں بغیر نمبر پلیٹ کے اسے چلا بھی نہیں سکتا۔‘
محکمہ ایکسائز کے مطابق ’اس سے پہلے رجسٹر ہونے والی سب سے مہنگی گاڑی کی مالیت 9 کروڑ 80 لاکھ تھی جو کہ جی ٹی مرسیڈیز تھی اور وہ بھی پاکستان کے ایک بڑے کاروباری شخص نے اپنے بیٹے کو تحفے میں دی تھی جس سے ایکسائز نے 35 لاکھ رجسٹریشن  فیس وصول کی تھی۔‘

شیئر: