وزیر اعظم کی رہائش گاہ کا نقشہ مشروط طور پر منظور کیا گیا ہے: شبلی فراز

وفاقی وزیر اطلاعات سینیٹر شبلی فراز نے وزیر اعظم عمران خان کی بنی گالہ رہائش گاہ کی ریگولرائیزیشن کے حوالے سے وضاحت کی ہے کہ وزیر اعظم کی رہائش گاہ کا نقشہ مشروط طور پر منظور کیا گیا ہے۔

اتوار کو ٹوئٹر پر لیگی رہنما مریم نواز کی جانب سے وزیر اعظم کی رہائش گاہ کی ریگولرائزیشن کے حوالے سے ٹویٹ کا جواب دیتے ہوئے وفاقی وزیر اطلاعات کا کہنا تھا کہ ’(ن) لیگی رہنما جھوٹ کا سہارا لے کر بد نیتی پر مبنی غلط تاثر نہ پھیلائیں۔ عمران خان نے ہمیشہ قانون کااحترام کیا۔ ان کے گھر کا نقشہ ابھی مشروط طور پر منظور کیاگیا ہے، یہ اپنے مذموم پروپیگنڈے سے عوام کو گمراہ نہیں کر سکتے، وہ جانتے ہیں کہ عمران خان نے ہمیشہ سچ اور اصول کا راستہ اپنایا ہے۔‘

خیال رہے کچھ ماہ قبل وفاقی ترقیاتی ادارہ (سی ڈی اے) نے بنی گالہ میں عمران خان کی رہائش گاہ کی قانونی منظوری دی تھی جس کے لیے 12 لاکھ روپیہ جرمانہ ادا کیا گیا تھا۔

اردو نیوز سے بات کرتے ہوئے سی ڈی اے کے ایک اعلی عہدیدار نے عمران خان کے گھر کو سی ڈی اے کی جانب سے قانونی حییثیت دینے کی تصدیق کی تھی۔

اس حوالےسے سی ڈی اے کی جانب سے منظوری کا ایک لیٹر پانچ  مارچ 2020 کو جاری کیا گیا تھا جو کہ اتوار کو سامنے آیا تھا۔

عہدیدار نے بتایا کہ سی ڈی اے نے بنی گالہ میں چند دیگر گھروں کی بھی اسی طرح کی منظوری دی تھی اور ایسے تمام گھر جو سی ڈی اے کے ضوابط پورے کریں گے ان کی بھی منظوری دے دی جائے گی۔ 

عمران خان کے گھر کے گراونڈ فلور پر 11ہزار 371 فٹ تعمیرات کی گئیں جن کے لیے سی ڈی اے کی منظوری نہیں لی گئی تھی۔