پاکستان کے صوبہ پنجاب میں حکومت کے ایک ترجمان کے مطابق وزیراعلیٰ پنجاب سردارعثمان بزدار کا کورونا کا ٹیسٹ مثبت آیا ہے جس کے بعد ڈاکٹرز نے انہیں آرام کا مشورہ دیا ہے۔
وزیراعلیٰ پنجاب کے ایک ترجمان اظہر مشوانی نے ٹویٹ میں تصدیق کی ہے کہ عثمان بزدار کا کورونا ٹیسٹ مثبت آیا ہے۔
CM Punjab @UsmanAKBuzdar has tested positive for COVID-19.
He had mild symptoms (Fever and Flu) since last night and in self-isolation as per the advice of Doctors.Request for prayers for early recovery.
— Azhar Mashwani (@MashwaniAzhar) December 21, 2020
وزیراعلیٰ پنجاب کے دفتر کی جانب سے جاری کردہ ایک بیان میں بتایا گیا ہے کہ وزیر اعلیٰ کی طبیعت ناساز ہے، انہوں نے تمام مصروفیات ترک کر دی ہیں۔ ڈاکٹرز نے وزیراعلیٰ عثمان بزدار کو مکمل آرام کا مشورہ دیا ہے۔
وزیراعلی پنجاب کی معاون برائے اطلاعات ڈاکٹر فردوس عاشق اعوان نے وزیراعلی کے کورونا وائرس میں مبتلا ہونے کی تصدیق کی تو ساتھ ہی اسے اپوزیشن اتحاد پاکستان ڈیموکریٹک موومنٹ (پی ڈی ایم) کی کارستانیوں کا نتیجہ قرار دے دیا۔ اپنی ٹویٹ میں انہوں نے لکھا کہ ’تمام تر احتیاط کے باوجود وزیراعلی پنجاب بھی کورونا میں مبتلا ہو گئے‘۔
ن لیگ پنجاب کی انفارمیشن سیکرٹری عظمی بخاری نے ڈاکٹر فردوس عاشق اعوان کی ٹویٹ میں کی گئی تنقید کا جواب دیا تو ان سے طنز بھرا شکوہ کرتے ہوئے کہا ’اوہو آپ پہلے بتا دیتی کہ وہ جلسہ دیکھنے آئے تھے تو میں اناؤنسمنٹ کروا دیتی، ان کو دھکے نہ کھانے پڑتے‘۔
