’انڈین کرکٹ ٹیم قوانین کی پاسداری نہیں کر سکتی، تو برسبن نہ آئے‘

آسٹریلوی ریاست کوئینز لینڈ کی حکومت نے کہا ہے کہ اگر انڈین ٹیم قواعد و ضوابط کی پابندی نہیں کر سکتی تو انہیں کوئز لینڈ آنے کی ضرورت نہیں۔

ہندوستان ٹائمز کے مطابق اتوار کو انڈین کرکٹ ٹیم کے حوالے سے کہا جا رہا تھا کہ ٹیم  چوتھے ٹیسٹ میچ کے لیے برسبن جانے کے لیے تیار نہیں۔

آسٹریلیا کے شہر برسبن میں بارڈر گواسکر ٹرافی کا چوتھا میچ ہونا ہے۔

آسٹریلوی ریاست کوئینز لینڈ میں داخلے پر انڈین ٹیم کو 14 دنوں کے لیے قرنطینہ میں رہنا پڑے گا۔ ہندوستان ٹائمز کے مطابق انڈین ٹیم نے کورونا سے متلعق مزید پابندیوں پر عمل درآمد کرنے سے انکار کیا ہے۔ 

انڈین کرکٹ ٹیم کے انکار کے بعد سڈنی کرکٹ گراؤنڈ میں چوتھے ٹیسٹ میچ کے کھیلے جانے کا امکان ہے۔

بارڈر گواسکر ٹرافی کے تحت کھیلی جانے والی سیریز کے لیے انڈین ٹیم آسٹریلیا میں موجود ہے جہاں سیریز کا پہلا ٹیسٹ میچ ایڈیلیڈ میں 17 دسمبر کو ہوا تھا۔

آسٹریلوی ریاست کوئینز لینڈ کی حکومت نے واضح کر دیا ہے کہ قواعد و ضوابط کی خلاف ورزی ممکن نہیں ہے۔

کوئینز لینڈ کی وزیر صحت روس بیٹس نے کہا ہے کہ اگر انڈین قوانین کی پاسداری نہیں کر سکتے، تو وہ نہ آئیں۔

کوئینز لینڈ کے وزیر کھیل ٹم مانڈر نے بھی کہا ہے کہ اگر انڈین کرکٹ ٹیم چوتھے ٹیسٹ میچ کے لیے برسبن کے قرنطینہ کے حوالے سے قواعد و ضوابط کو نظر انداز کرتی ہے تو انہیں نہیں آنا چاہیے۔

انہوں نے کہا سب پر ایک جیسے قوانین لاگو ہونے چاہیے۔