60 سال سے زائد عمر کے افراد کو ویکسین لگانے کا آغاز 10 مارچ سے

پاکستان میں 60 سال سے زائد عمر کے افراد کو کورونا ویکسین لگوانے کی مہم کا آغاز 10 مارچ سے ہو رہا ہے۔

کورونا وائرس کی صورتحال کو مانیٹر کرنے کے لیے قائم نیشنل کمانڈ اینڈ آپریشن سینٹر (این سی او سی) کے سربراہ وفاقی وزیر اسد عمر نے اعلان کیا ہے کہ 10 مارچ سے پاکستان میں 60 سال اور اس سے زائد عمر کے افراد کو کورونا ویکیسن لگوانے کی مہم کا آغاز ہوگا۔  

اتوار کو وفاقی وزیر اسد عمر نے ٹویٹ کرتے ہوئے کہا کہ ’بدھ 10 مارچ سے 60 سال اور اس سے زائد عمر افراد  کے لیے ویکسینیشن کے عمل کا آغاز ہوگا۔‘  

انہوں نے ویکسینیشن کے عمل کے متعلق کہا کہ ویکسین عمر کے اعتبار سے ’ریورس آرڈر‘ میں لگوائی جائی گی، یعنی زیادہ عمر رسیدہ شخص جس نے اندراج کیا ہے اسے ویکسین پہلے لگائی جائے گی جبکہ اس حوالے سے مزید تفصیلات سے کل آگاہ کیا جائے گا۔ 

اسلام آباد کے ڈسٹرکٹ ہیلتھ آفیسر زعیم ضیا نے اردو نیوز کو بتایا کہ ’وفاقی حکومت کی جانب سے 60 سال اور اس سے زائد عمر کے افراد کو ویکسینیشن کا عمل شروع کرنے کی اجازت مل گئی ہے جس حوالے سے انتظامات مکمل کیے جارہے ہیں۔‘  

زعیم ضیا کے مطابق ’60 سال اور اس سے زائد عمر کے افراد کو چینی کمپنی کی تیار کردہ ویکسین سائینو فارم لگانے کی اجازت دی گئی ہے۔‘  

خیال رہے کہ پاکستان میں 3 فروری کو ابتدائی طور پر ہیلتھ کیئر ورکرز کو کورونا ویکسین لگوانے کی مہم کا آغاز ہو چکا ہے، جبکہ 60 سال اور اس سے زائد عمر کی افراد کی رجسٹریشن کا عمل 15 فروری سے جاری ہے۔  

ویکسین کے لیے رجسٹریشن کیسے کروائیں؟ 

پاکستان میں وفاقی حکومت نے تمام شہریوں کو مفت ویکسین فراہم کرنے کا اعلان کیا ہے، اس کے علاوہ نجی کمپنیوں کو بھی ویکسین درآمد کرنے کی اجازت دے رکھی ہے۔  

حکومت پاکستان کی جانب سے ویکسین فراہم کرنے کا پہلا مرحلہ 3 فروری کو ہیلتھ کیئر ورکرز سے شروع کیا گیا ہے جبکہ دوسرے مرحلے میں 60 سال سے زائد عمر کے افراد کو ویکسین لگوائی جائے گی۔  

ویکسین کی رجسٹریشن کے لیے شہریوں کو شناختی کارڈ نمبر 1166 پر بھیجنا ہوگا جس کے بعد رجسٹریشن کا عمل مکمل ہونے کا جوابی میسج موصول ہوگا۔  

رجسٹریشن کے لیے ناردا نے ایک خصوصی سافٹ وئیر بھی بنایا ہے جسے نیشنل امیونائزیشن مینجمنٹ سسٹم (این آئی ایم ایس) کہا جاتا ہے۔ 

اپنے کمپیوٹر یا موبائیل پر شہری اس پتے https://nims.nadra.gov.pk/nims/  پر جا کر کورونا ویکسین کے لیے رجسٹریشن کرا سکتے ہیں۔

ایس ایم ایس کرنے یا این آئی ایم ایس کے ذریعے رجسٹر ہونے کے بعد آپ کے شناختی کارڈ پر درج موجودہ پتے کے مطابق آپ کو قریبی ویکسین سنٹر کا پتہ ایس ایم ایس کے ذریعے موصول ہو گا۔  

اس کے بعد آپ کو انتظار کرنا ہو گا اور جوں ہی ویکسین آپ کے درج کردہ سینٹر میں دستیاب ہو جائے گی تو آپ کو ایس ایم ایس کے ذریعے ویکیسن لگانے کی تاریخ اور وقت بتایا جائے گا۔ سینٹر پر ساتھ لانے کے لیے ایک پن کوڈ بھی بھیجا جائے گا جو ساتھ لانا ضروری ہو گا۔ 

میسج موصول ہونے کے بعد اگر کسی وجہ سے آپ سنٹر تبدیل کروانا چاہیں تو سات دن کے اندر ہیلتھ کیئر یونٹ ایک دفعہ تبدیل کرایا جا سکتا ہے۔ اس کے لیے آپ کو 1166 پر کال کرنا ہو گی یا این آئی ایم ایس سسٹم پر جا کر اپنا سنٹر تبدیل کروانا ہو گا۔ 

ویکسین سینٹرز پر شہریوں کی سہولت کے لیے معلوماتی کاؤنٹرز بنائیں گئے ہیں جہاں آنے والے تمام افراد کے نام، عمر اور درجہ حرارت کا اندراج کیا جائے گا۔ 

شناخت کی تصدیق کے بعد شہریوں کو تربیت یافتہ عملے کی جانب سے ویکسین لگائی جائے گی۔ ویکسین لگنے کے بعد کم از کم 30 منٹ تک ویکسین سنٹر میں ہی رکھا جاتا ہے تاکہ مانیٹر کیا جا سکے کہ ویکیسن کے کوئی سائیڈ افیکٹس تو ظاہر نہیں ہو رہے۔