Sorry, you need to enable JavaScript to visit this website.

ٹی 20 میں بابر اعظم کی پہلی سینچری: یہ مائیک گرا دینے والا لمحہ ہے‘

آئی سی سی نے بابر اعظم کو ون ڈے کے بہترین بلے باز کے اعزاز سے نوازا ہے (فوٹو: پی سی بی)
ون ڈے میں دنیا کے بہترین بلے باز کا اعزاز حاصل کرنے والے پاکستان کرکٹ ٹیم کے کپتان بابر اعظم نے ایک بار پھر اپنے مداحوں کو خوش کر دیا ہے۔
بدھ کے روز جنوبی افریقہ کے خلاف کھیلے گئے میچ میں شاندار بیٹنگ کا مظاہرہ کرتے ہوئے کپتان بابر اعظم نے ٹی 20 میں اپنی پہلی سینچری سکور کی اور 59 گیندوں پر 122 رنز بنائے۔
’بال پِکر‘ سے دنیا کے نمبر ون بیٹسمین کا اعزاز حاصل کرنے تک، کامیاب کھلاڑی کے طور پر ان کی زندگی کے چرچے دنیا بھر میں کیے جا رہے ہیں۔ اب 59 گیندوں پر 122 رنز سکور کرنے پر سوشل میڈیا صارفین انہیں ’شیر‘ کا لقب دے رہے ہیں۔

 

میچ میں 15 چوکوں اور چار چھکوں کی مدد سے بنائی گئی اس سنچری کی دھوم سوشل میڈیا پر خوب ہو رہی ہے۔
سوشل میڈیا صارفین بابر اعظم کی عمدہ بیٹنگ پر انہیں ٹویٹس اور تبصروں کے ذریعے داد دے ہے ہیں۔
ٹوئٹر صارف جنید، بابر اعظم کی ویڈیو شیئر کرتے ہوئے لکھتے ہیں کہ ’یہ شیر کی دھاڑ ہے۔ بابر اعظم نے ٹی 20 کی پہلی سنچری مکمل کر لی۔‘
جہاں بابر اعظم کی بیٹنگ پر سوشل میڈیا صارفین نے اپنے خیالات کا اظہار کرتے ہوئے ان کو سراہا وہیں معروف شخصیات بھی پیچھے نہ رہیں۔
سوئنگ کے سلطان وسیم اکرم اپنے آفیشل ٹوئٹر اکاؤنٹ پر جنوبی افریقہ کہ خلاف کھلیے گئے میچ پر مبارک باد دیتے ہوئے لکھتے ہیں کہ ’ٹیم گرین کو مبارک ہو بہترین گیم۔ ایک بڑے ہدف کا باآسانی تعاقب کیا اور دنیا کے بہترین کھلاڑی کی جانب سے زبردست اننگز۔ مجھے آپ لوگوں پر فخرہے۔‘
کرکٹ مداحوں کے علاوہ کھلاڑیوں نے بھی دل کھول کر بابر اعظم کو داد دی۔ کرکٹر امام الحق ٹوئٹر پر جنوبی افریقہ کے خلاف میچ پر تبصرہ کرتے ہوئے لکھتے ہیں کہ ’بابر اعظم کی یہ سنچری کو یقیناً آنے والے کئی برسوں تک یاد رکھا جائے گا اور رضوان نے بھی اچھا کھیلا۔ تاریخی فتح مبارک ہو۔‘

کرکٹ سے وابستہ شخصیات اور کرکٹ کے مداحوں نے پاکستانی کرکٹ ٹیم کی حوصلہ افزائی تو کی ہی لیکن پاکستان کی سیاسی شخصیات بھی اس کامیابی کو سراہے بغیر نہ رہ سکیں۔
وزیر اعظم پاکستان کے معاون خصوصی برائے اوورسیز پاکستانیز زلفی بخاری لکھتے ہیں کہ ’یہ پاکستان کے لیے مائیک گرا دینے والا لمحہ ہے۔ بہترین کھیل کا مظاہرہ کیا اور بابر اعظم کے سب سے زیادہ سکور ہونے پر ایک بڑی مبارک باد۔‘

وزیر برائے صحت خیبر پختونخوا تیمور جھگڑا لکھتے ہیں کہ ’اگر پاکستان ہر میچ میں اسی طرح کھیلتا تو اتنے زیادہ ناخن نا چبائے جاتے۔ پاکستان کو ایک شاندار فتح مبارک ہو۔‘
پاکستان کے سابق فاسٹ بولر شعیب اختر نے اپنے یوٹیوب چینل پر ویڈیو جاری کی جس میں انہوں نے پاکستان اور جنوبی افریقہ کے درمیان کھیلے جانے والے اس میچ پر تبصرہ کیا۔
وہ کہتے ہیں کہ ’بابر اعظم نے بتا دیا کہ ’وہ 50  پر 50  ہی نہیں بلکہ 50 پر سوا سو بھی کر سکتا ہے۔ یہ پاکستان کی بیٹنگ اور چیزنگ کو ایک نئے دور کی طرف لے کر جا رہا ہے۔

شیئر: