پاکستان میں کورونا کی شدت، ہلاکتوں کی تعداد پہلی بار 200 سے متجاوز

پاکستان میں کورونا کی تیسری لہر کی شدت برقرار ہے اور گذشتہ 24 گھنٹوں کے دوران کورونا وائرس سے 201 افراد ہلاک ہو گئے ہیں جو اس مہلک وبا سے اب تک ایک دن میں ہونے والی اموات کی سب سے زیادہ تعداد ہے۔

نیشنل کمانڈ اینڈ کنٹرول سینٹر کی جانب سے بدھ کو جاری اعداد و شمار کے مطابق پاکستان میں گذشتہ 24 گھنٹوں میں 49 ہزار 101 ٹیسٹ کیے گئے جن میں سے پانچ ہزار 292 ٹیسٹ مثبت آئے۔

پاکستان میں منگل سے 40 سال سے زائد عمر کے افراد کی ویکسینیشن کے لیے رجسٹریشن کا عمل شروع ہو چکا ہے۔

نیشنل کمانڈ اینڈ کنٹرول سینٹر کے سربراہ اسد عمر نے کہا ہے کہ منگل کو ایک لاکھ 17 ہزار 852 افراد کو کورونا وائرس سے بچاؤ کی ویکسین لگائی گئی۔

انہوں نے ٹویٹ کیا کہ گذشتہ دن پہلی دفعہ ایک لاکھ سے زائد افراد نے کورونا ویکسینیشن کی۔

سربراہ این سی او سی کے مطابق ’خوشی ہے کہ لوگ زیادہ تعداد میں ویکسین لگانے کے لیے اندراج کر رہے ہیں، مجموعی طور پر 21 لاکھ افراد کی ویکسینیشن کی جا چکی ہے۔ برائے مہربانی 40 اور اس سے زیادہ افراد کو ویکسین کی رجسٹریشن کی ترغیب دیں۔‘

پیر کو اپنی ایک ٹویٹ میں این سی او سی کے سربراہ اسد عمر نے بتایا تھا کہ ’آج این سی او سی کے اجلاس میں فیصلہ کیا گیا ہے کہ کل سے 40 سال سے زائد عمر کے افراد کو ویکسین لگانے کے لیے رجسٹریشن ہوگی اس کے علاوہ 50 سال سے زائد عمر کے رجسٹرڈ افرادبھی ویکسینیشن کے لیے آ سکتے ہیں۔‘

انہوں نے مزید لکھا کہ ’اگر آپ 40 سال یا اس سے زائد عمر کے ہیں تو خود کو رجسٹر کرائیں اور دوسروں کو بھی رجسٹر ہونے کا کہیں۔‘

اس سے قبل گذشتہ مہینے 26 مارچ سے 50 سال سے زائد عمر کے پاکستانی شہریوں کے لیے کورونا ویکسین کی رجسٹریشن کا آغاز کیا گیا تھا۔

اسد عمر نے نے بتایا تھا کہ ’ 60 سال سے زائد عمر کے شہریوں کی رجسٹریشن اور ویکسینیشن کا آغاز پہلے ہی ہو چکا ہے۔ اب 50 سال سے اوپر کے شہریوں کی رجسٹریشن کی جائے گی۔‘

اس سے قبل ملک میں تین مراحل میں ویکسین لگائی گئی۔ پہلے مرحلے میں ڈاکٹرز اور طبی عملے کو ویکسین لگانے کا آغاز دو فروری کو ہوا۔

دوسرے مرحلے میں 60 سال سے زائد عمر کے بزرگ شہریوں کو کورونا ویکسین لگانا شروع کی گئی، جبکہ تیسرے مرحلے میں 50 سال سے زیادہ عمر کے شہریوں کو ویکسین لگائی گئی۔

پاکستان میں وفاقی حکومت نے تمام شہریوں کو مفت ویکسین فراہم کرنے کا اعلان کیا ہے۔ اس کے علاوہ نجی کمپنیوں کو بھی ویکسین درآمد کرنے کی اجازت دے رکھی ہے۔ ڈرگ ریگولیٹری اتھارٹی آف پاکستان (ڈریپ) نے وفاقی کابینہ کی منظوری سے روسی اور چینی کمپنیوں کی ویکسین کی قیمتیں بھی مقرر کر دی ہیں۔

ویکسین لگوانے کے لیے شہریوں کو شناختی کارڈ نمبر 1166 پر میسج بھیج کر رجسٹریشن کرانا ہوگی جس کے بعد رجسٹریشن کا عمل مکمل ہونے کا جوابی پیغام موصول ہوگا۔