ترک شہریوں کی ’نقل مکانی‘، بیرونِ ملک پناہ کی درخواستوں میں 506 فیصد اضافہ

ترکی میں حال ہی میں دو ٹک ٹاک صارفین کو ترک نوجوانوں کے وبا کے دوران بیرون ملک جانے کے قابل نہ ہونے کے حوالے سے طنزیہ ویڈیو شیئر کرنے پر گرفتار کیا گیا ہے۔ اس واقعے نے اعلٰی صلاحیتوں کے حامل افراد اور نوجوانوں کے ملک چھوڑ کر جانے پر بحث کو بڑھا دیا ہے۔

عرب نیوز کے مطابق دو 23 سالہ صارفین نے بظاہر ترک حکام کو مشتعل کر دیا اور ان پر اپنے طنزیہ کلپ میں ’ریاست کی خود مختاری کے نشان کی کھلم کھلا توہین‘ کا الزام لگایا گیا۔

حالیہ اعداد و شمار کے مطابق ترکی جہاں کچھ حکام کے لیے مزاح بھی ناقابل معافی عمل بن گیا ہے، شہریوں کی بڑی تعداد بیرون ملک جانے کو ترجیح دے رہی ہے۔

یورپی دفتر شماریات کے تازہ اعداد و شمار کے مطابق ’سنہ 2019 سے ترکی سے یورپ پناہ کی درخواستوں میں 506 فیصد اضافہ ہوا ہے۔‘

ماہرین کے مطابق اتنے وسیع پیمانے پر لوگوں کی نقل مکانی کا بنیادی تعلق معاشی مشکلات اور آزادی اظہار رائے اور جمہوریت پر منظم کریک ڈاؤن سے ہے۔

یورپ میں محفوظ پناہ گاہ کی تلاش میں ترکوں کا پناہ، امیگریشن اور یورپی ممالک میں عارضی حفاظت کی درخواستوں میں پانچواں نمبر ہے جو رینکنگ میں شامیوں، وینزویلینز، افغانیوں اور عراقیوں کے بعد آتا ہے۔

انہی اعداد و شمار میں ترکی کے بعد صومالیہ، اریٹیریا، ایران اور پاکستان کا نمبر ہے۔

سنہ 2015 میں 2 ہزار 995 ترک شہریوں نے یورپی ممالک میں پناہ کی درخواست دی تھی لیکن سنہ 2020 میں یہ تعداد بڑھ کر 18 ہزار سے زائد ہو گئی۔

اس رحجان میں حالیہ برسوں میں ہی اضافہ ہوا ہے۔ پڑھے لکھے نوجوان یورپی ممالک خاص طور پر جرمنی میں نئی زندگیاں اور نئے مستقبل بنانے کی کوشش کر رہے ہیں، جہاں زیادہ تر ترکوں نے تحفظ اور پناہ کی درخواستیں دی تھیں۔