’جلدی آؤ، جلدی آؤ‘: منی ہائسٹ میں چوروں کا آرمی سے سامنا

نیٹ فلکس کی مقبول ترین ویب سیریز ’منی ہائسٹ‘ کا پانچواں سیزن تین ستمبر کو دنیا بھر میں ریلیز کیا جارہا ہے اور اس وقت یہ شو پاکستانی ٹوئٹر پر بھی ٹرینڈ کررہا ہے۔ چوتھے سیزن کے اختتام پر ہسپانوی پولیس سیریز کے مرکزی کردار یعنی ’پروفیسر‘ تک پہنچ جاتی ہے اور اس کے باقی ساتھی بینک آف سپین میں پھنسے رہتے ہیں۔

اس سیریز کے چار سیزنوں میں پروفیسر اور اس کے گینگ نے تقریباً ہر قسم کی مشکلات کا سامنا کیا ہے لیکن پانچویں سیزن میں پہلی مرتبہ ہسپانوی حکومت ان چوروں کے خلاف آرمی کا استعمال کرنے جارہی ہے۔

اس سیریز کے ٹریلر میں دکھایا گیا ہے کہ پروفیسر کو ایک پولیس افسر گرفتار کرچکی ہے اور ایسے میں اس کی گرل فرینڈ جس کا کوڈ نیم ’لزبن‘ ہے وہ پروفیسر سے رابطہ کرتی ہے۔

پروفیسر جو کرسی پر بندھا بیٹھا ہے کہتا ہے کہ ’ایسا ممکن ہے کہ میں آپ سب لوگوں سے آج آخری بار بات کررہا ہوں۔‘

ٹریلر کو دیکھ کر اندازہ لگایا جاسکتا ہے کہ اس بار گینگ کو بینک آف سپین سے زندہ نکالنے کی ذمہ داری لزبن نے لے لی ہے۔

ٹوئٹر پر بھی صارفین اس سیریز کے پانچویں سیزن کا بے صبری سے انتظار کرتے نظر آرہے ہیں۔

مطیع الرحمان نامی ٹوئٹر صارف پروفیسر کی تصویر شیئر کرتے ہوئے کہتے ہیں کہ ’اگر آپ کو لگتا ہے کہ زیادہ سوچنا غلط ہے تو یاد رکھیں یہ آدمی بھی زیادہ سوچتا ہے۔‘

جہاں لوگوں کو اپنی پسندیدہ کرداروں کی فکر لاحق ہے وہاں کچھ لوگ سیریز میں پروفیسر کے بھائی کا کردار نبھانے والے شخص ’برلن‘ کے اس سیزن میں نہ ہونے پر بھی بے حد افسوس کر رہے ہیں۔

اس کے علاوہ نیٹ فلکس انڈیا نے منی ہائسٹ کی ریلیز سے قبل بالی وڈ سٹارز کو بھی اس سیریز کے نئے سیزن کا انتظار کرتے ہوئے دکھایا ہے۔

اس ویڈیو میں انیل کپور کہتے ہیں ’ہم اب اور انتظار نہیں کرسکتے۔‘

اور نیٹ فلکس انڈیا کی جانب سے جاری کردہ ویڈیو میں منی ہائسٹ کی ہی طرز پر ایک گانا بھی بنایا گیا ہے جس کے بول ہیں ’منی ہائسٹ، جلدی آؤ، جلدی آؤ‘۔