قطر کے وزیرخارجہ کی آرمی چیف جنرل قمر باجوہ سے ملاقات

قطر کے نائب وزیراعظم اور وزیر خارجہ شیخ محمد بن عبدالرحمن بن جاسم الثانی نے پاکستان کے چیف آف آرمی سٹاف جنرل قمر جاوید باجوہ سے ملاقات کی۔

پاکستان کی فوج کے شعبہ تعلقات عامہ (آئی ایس پی آر) جمعہ کو جاری پریس ریلیز کے مطابق اسلام آباد میں ہونے والی اس ملاقات میں باہمی دلچسپی کے امور، علاقائی سلامتی کی صورتحال بالخصوص افغانستان کی موجودہ صورتحال اور مختلف شعبوں میں تعاون پر تبادلہ خیال کیا گیا۔

آرمی چیف نے افغانوں کے لیے انسانی امداد میں توسیع کے عزم کا اعادہ کیا۔

آرمی چیف نے کہا کہ پاکستان اپنے بین الاقوامی پارٹنرز کے ساتھ مل کر خطے میں امن اور افغانستان کے لوگوں کے مستحکم اور خوشحال مستقبل کو یقینی بنانے کے لیے پرعزم ہے۔

قطر کے وزیر خارجہ نے افغانستان سے کامیاب انخلاء کے آپریشنز، علاقائی استحکام کے لیے کوششوں میں پاکستان کے کردار کو سراہا اور ہر سطح پر پاکستان کے ساتھ سفارتی تعاون میں مزید بہتری کے لیے اپنا کردار ادا کرنے کا عزم کیا۔