پاکستان جیت گیا: ’ڈئیر انڈینز، پلیز اپنے ٹی وی نہ توڑنا‘

آج بروز اتوار دبئی میں کچھ ایسا ہوا جو پاکستان کی کرکٹ کی تاریخ میں آج تک نہیں ہوا تھا۔

پاکستان نے ورلڈکپ کے مقابلوں میں روایتی حریف انڈیا کو پہلی مرتبہ ہرا کر تاریخ رقم کر دی ہے اور شائقین کرکٹ اس جیت پر پھولے نہیں سما رہے۔

ملک کے مختلف شہروں میں آتش بازی دیکھنے میں آئی اور لوگ ڈھول کی دھاپ پر رقص کرتے رہے۔

پاکستان ٹیم کی شاندار جیت پر وزیراعظم عمران خان نے کپتان بابر اعظم کو شاباشی دی اور کہا کہ محمد رضوان اور شاہین شاہ آفریدی نے بھی زبردست کھیل پیش کیا۔

’قوم کو آپ پر فخر ہے۔‘

پاکستان مسلم لیگ (ن) کی نائب صدر مریم نواز شریف نے میچ ختم ہوتے ہی قومی ٹیم کے کھلاڑیوں کو بہترین کارکردگی دکھانے پر شاباشی دی اور ’پاکستان زندہ باد‘ کا نعرہ لگادیا۔‘

میچ جیتنے کی خوشی سے زیادہ پاکستانی شائقین کو انڈیا کو ہرانے کی خوشی تھی۔

فخر درانی نامی صارف نے لکھا ’ڈئیر انڈینز، پلیز اپنے ٹی وی نہ توڑنا۔‘

میچ ہارنے کے باوجود ورات کوہلی پاکستان کے دونوں اوپنرز سے گلے ملتے دکھائی دیے اور یہ بات پاکستانی شائقین کرکٹ کو بھاگئی۔

منصور علی خان نے کہا کہ پاکستان اور انڈیا کو مزید ایسی تصاویر کی ضرورت ہے۔

لوگوں کا کہنا ہے کہ انڈین کپتان نے میچ ہارنے کے باوجود ’سپورٹس مین سپرٹ‘ کا ثبوت دیا۔

صارفین دونوں ملکوں کے کپتانوں کی ساتھ تصاویر بھی شئیر کرتے رہے جو اس بات کا ثبوت ہے کہ لوگ دونوں ملکوں کے درمیان مزید مقابلے دیکھنا چاہتے ہیں۔

پاکستان کی جانب سے بہترین بولنگ کرنے پر شاہین شاہ آفریدی کو ’مین آف دی میچ‘ کا ایوارڈ دیا گیا۔