انڈیا میں شادیوں پر پیٹرول اور ڈیزل کا تحفہ، ’ہم کس دور میں زندہ ہیں‘

انڈیا کی سرکاری آئل کمپنی انڈین آئل کارپوریشن لمیٹڈ نے صارفین سے اپنے چاہنے والوں کو شادیوں پر پیٹرول اور ڈیزل تحفتاً دینے کا آپشن دے دیا ہے۔

پیر کو انڈیا کی سرکاری آئل کمپنی نے ٹویٹ کیا کہ ’اپنے پیاروں کی زندگی کے آغاز کو مزید خاص بنائیں۔ شادیوں کا جشن منانے کے لیے پرفیکٹ گفٹ، انڈین آئل کا ای واؤچر آج ہی لیں اور ان (پیاروں) پر محبت نچھاور کریں۔‘

انڈین آئل کی یہ پیشکش سوشل میڈیا صارفین کو بالکل نہ پسند آئی جس کی وجہ ملک میں پیٹرول اور ڈیزل کی بڑھتی ہوئی قیمتیں ہیں۔

اجے نامی ٹوئٹر صارف نے اس پیشکش پر تبصرہ کرتے ہوئے لکھا کہ ’فیول جہیز کے طور پر؟ ہم کس دور میں زندہ ہیں!‘

الیاس نامی صارف نے کمپنی پر تنقید کرتے ہوئے کہا کہ ’شرم کریں انڈین آئل، آپ نے انڈینز کی جیبوں کو لوٹا اور اب یہ سلی واؤچر تحفے میں۔‘

انڈین سیاسی جماعت ترینامول کانگریس کے ترجمان ساکت گوکھلے نے اس حوالے سے سوشل میڈیا پر لکھا کہ ’یہ مذاق نہیں بلکہ انڈین آئل واقعی میں ایسے اشتہارات بنا رہی ہے اور ’فیول واؤچر‘ کو شادیوں پر تحفے دینے کا پیغام دے رہی ہے۔‘

انہوں نے مزید کہا کہ ’بنیادی طور پر شادی کرنے والوں کو پیٹرول اور ڈیزل تحفے میں دیں۔‘

ساکت گوکھلے نے وزیراعظم مودی پر طنز کرتے ہوئے کہا کہ ان کی حکومت نے بڑھتی ہوئی قیمتوں کی مارکیٹنگ کرنا کا بھی طریقہ نکال لیا ہے۔

ینگر لونگ کمار نامی صارف نے تبصرہ کیا کہ ’انڈین آئل فیول گفٹ واؤچر بیچ رہا ہے۔ میں انتظار میں ہوں کہ قومی ہورٹی کلچر بورڈ اب ٹماٹر گفٹ واؤچر لے آئے۔‘

سومیاجیت مجمدار نامی صارف نے طنزاً لکھا کہ ’کس نے سوچا تھے کہ ایک دن آپ شادیوں پر پیٹرول اور ڈیزل گفٹ کر رہے ہوں گے۔‘

انڈین آئل کی جانب سے ’فیول واؤچر‘ تحفے میں دینے کے اشتہارات پہلی بار نہیں چلے بلکہ اس سے قبل دیوالی پر بھی کمپنی نے لوگوں کے لیے ایسے ہی واؤچر متعارف کروائے تھے۔

انڈیا میں سوشل میڈیا صارفین کے غصے کی ایک بڑی وجہ پیٹرول اور ڈیزل کی بڑھتی ہوئی قیمتیں ہیں۔ اس وقت انڈیا میں پیٹرول کی قیمت 104 سے 110 روپے ہے جبکہ ایک لیٹر ڈیزل انڈیا میں 87 سے 94 روپے بک رہا ہے۔