36 ہزار فٹ کی بلندی پر دوران پرواز دو مسافروں میں ہاتھا پائی، ٹی شرٹ پھاڑ دی

بنگلہ دیش کی بیمان ایئرلائنز کی لندن سے بنگلہ دیش جانے والی پرواز میں دو مسافروں کے درمیان لڑائی کی ویڈیو سوشل میڈیا پر وائرل ہو رہی ہے۔

واقعہ اس وقت پیش آیا جب دونوں مسافروں کے درمیان پہلے تلخ کلامی ہوئی، جو بعد میں ہاتھا پائی میں تبدیل ہوگئی۔

ویڈیو میں دونوں مسافروں کو ایک دوسرے پر مکے برساتے دیکھا جاسکتا ہے، جبکہ جھگڑے کے دوران ایک مسافر کی ٹی شرٹ بھی پھٹ گئی۔

دورانِ پرواز ہونے والی اس لڑائی سے طیارے میں موجود دیگر مسافر بھی پریشان نظر آئے۔

رپورٹ کے مطابق طیارے میں بچے اور بزرگ مسافر بھی موجود تھے، جن میں واقعے کے باعث خوف و ہراس پھیل گیا۔

وائرل ویڈیو میں دونوں مسافروں کو پہلے ایک دوسرے سے بحث کرتے اور پھر لڑتے ہوئے دیکھا جاسکتا ہے، جبکہ بعد میں کیبن کریو اور دیگر مسافروں نے مداخلت کرکے دونوں افراد کو ایک دوسرے سے الگ کردیا۔

ویڈیو میں طیارے کے کیبن میں موجود دیگر مسافروں کو بھی لڑائی کے دوران ردعمل دیتے ہوئے دیکھا جاسکتا ہے۔

دونوں مسافروں کے درمیان جھگڑے کی اصل وجہ فوری طور پر سامنے نہیں آسکی اور یہ بھی واضح نہیں ہوسکا کہ واقعے کے بعد ان کے خلاف کوئی کارروائی کی گئی یا نہیں۔

بیمان بنگلہ دیش ایئرلائنز کے جنرل منیجر برائے تعلقات عامہ محبوب الدین احمد نے ’ڈھاکا ٹریبیون‘ کو بتایا کہ انہیں رابطہ کیے جانے تک واقعے کا علم نہیں تھا۔

انہوں نے کہا، ’مجھے ابھی اس معاملے کا علم نہیں، میں اس بارے میں معلومات حاصل کر رہا ہوں۔‘