پی ایس ایل 7 میں کراچی کنگز کو مسلسل پانچویں میچ میں شکست

پاکستان سپر لیگ (پی ایس ایل) کے ساتویں ایڈیشن کے 14ویں میچ میں اسلام آباد یونائیٹڈ نے کراچی کنگز کو 42 رنز سے شکست دے دی ہے۔ 

یہ کراچی کنگز کی اس سیزن میں مسلسل پانچویں شکست ہے۔ 

اتوار کو کراچی کے نیشنل سٹیڈیم میں کھیلے گئے میچ میں ٹاس جیت کر اسلام آباد یونائیٹڈ نے پہلے بیٹنگ کرتے ہوئے 20 اوورز میں چھ وکٹوں کے نقصان پر 177 رنز بنائے تاہم کراچی کنگز 20 اوورز میں نو وکٹوں کے نقصان پر صرف 135 رنز ہی بنا سکی۔

کراچی کنگز کی جانب سے بابر اعظم اور شرجیل خان نے اننگز کا آغاز کیا جو اچھا ثابت نہ ہو سکا اور شرجیل چھ رنز بنا کر رن آوٹ ہوگئے۔

اس کے بعد بابر اعظم بھی کچھ خاص نہ کر سکے اور صرف آتھ رنز بنا کر محمد وسیم کی گیند پر بولڈ ہوگئے۔

حسن علی نے اپنے پہلے اوور کی پہلی ہی گیند پر آئن کوک بین کو بولڈ کر دیا۔

چوتھے آوٹ ہونے والے کھلاڑی صاحبزادہ فرحان تھے جو 25 رنز بنا کر رن آوٹ ہوگئے۔

کراچی کنگز کا سکور تھوڑا سا ہی آگے بڑھا کہ شاداب خان نے ایک ہی اوور میں پہلے لیوس گریگوری اور پھر عماد وسیم کو پویلین واپس بھیج دیا۔

شاداب خان نے اپنے اگلے ہی اوور میں کرس جورڈن اور محمد طحہٰ کو آوٹ کر دیا۔

نویں آوٹ ہونے والے کھلاڑی عمید آصف تھے جو 10 رنز بنا کر وقاص مقصود کی گیند پر کیچ آوٹ ہوئے۔

اسلام آباد کی اننگز کا احوال

اسلام آباد یونائیٹڈ کی جانب سے پال سٹرلنگ اور ایلکس ہیلز نے اننگز کا آغاز کیا اور دونوں کے درمیان 66 رنز کی شراکت داری بنی جس کے بعد ہیلز عماد وسیم کی گیند پر کیچ آوٹ ہوگئے۔ انہوں نے 30 رنز بنائے۔

مجموعی سکور میں نو رنز کے اضافے کے ساتھ پال سٹرلنگ بھی 39 رنز بنا کر محمد نبی کی گیند پر بولڈ ہوگئے۔

یونائیٹڈ کے تیسرے آوٹ ہونے والے کھلاڑی شاداب خان تھے جو 19 گیندوں پر 34 رنز بنا کر کرس جورڈن کی گیند پر کیچ آوٹ ہوگئے۔

اس کے بعد آصف علی بھی زیادہ دیر وکٹ پر نہ ٹھہر سکے اور 10 رنز بنا کر عثمان شنواری کی گیند ہر کیچ تھما بیٹھے۔

کولن منرو بھی 33 رنز بنا کر کرس جورڈن کی گیند پر آوٹ ہوگئے۔ یونائیٹڈ کے آخری آوٹ ہونے والے کھلاڑی اعظم خان تھے جو 16 رنز بنا کر عمید آصف کا شکار بنے۔

واضح رہے کہ کراچی کنگز ابھی تک ٹورنامنٹ میں کوئی بھی میچ نہیں جیت سکی جبکہ اسلام آباد یونائیٹڈ چھ پوائنٹس کے ساتھ دوسرے نمبر پر ہے۔