Sorry, you need to enable JavaScript to visit this website.

’شاہین آفریدی!یو بیوٹی،‘سوشل میڈیا پر قلندرز کے کپتان کی بیٹنگ کے چرچے

سپر اوور میں لاہور قلندرز کی ٹیم میچ تو نہ جیت سکی لیکن شاہین شاہ آفریدی مداحوں کے دل ضرور جیت لیے۔ (فوٹو: لاہور قلندرز)
پاکستان کرکٹ ٹیم کے فاسٹ بولر اور لاہور قلندرز کے کپتان شاہین شاہ آفریدی دنیا بھر میں اپنی تیز رفتار گھومتی ہوئی گیندوں کے سبب شہرت رکھتے ہیں لیکن پیر کی رات انہوں نے شائقین کو اس وقت حیران کر دیا جب پشاور زلمی کے خلاف ان کی ٹیم کو آخری اوور میں جیت کے لیے 23 رنز درکار تھے۔
شاہین شاہ آفریدی وکٹ پر آئے اور وہ کر دکھایا جو اکثر ایک اور آفریدی یعنی شاہد آفریدی دکھاتے تھے۔ انہوں نے ایک اوور میں 22 رن بنائے اور اپنی ٹیم کو جیت کا ایک اور موقع دینے کے لیے سپر اوور تک لے گئے۔
سپر اوور میں لاہور قلندرز کی ٹیم میچ تو نہ جیت سکی لیکن شاہین شاہ آفریدی نے اپنی جارحانہ بیٹنگ سے مداحوں کے دل ضرور جیت لیے۔
شاہین شاہ آفریدی اس وقت سوشل میڈیا پر سب سے زیادہ ڈسکس ہونے والے کھلاڑی ہیں۔
پاکستان کے سابق کپتان شاہد آفریدی بھی ان کی تعریف کیے بغیر نہ رہ سکے اور وہ لفظ جو اکثر ان کے اپنے لیے کہے جاتے تھے وہ انہوں نے شاہین شاہ آفریدی کے لیے ادا کیے۔
’شاہین آفریدی!!! یو بیوٹی۔‘
پاکستان تحریک انصاف کے رکن قومی اسمبلی اور سابق وزیر شہریار آفریدی نے اپنی ایک ٹویٹ میں لکھا کہ ’شاہین آفریدی ایک سٹار بننے جا رہے ہیں۔‘
فرید خان نامی صارف کو لاہور قلندرز کے کپتان کی بیٹنگ میں سابق آسٹریلوی بیٹسمین میتھیو ہیڈن کے رنگ نظر آئے۔ واضح رہے میتھیو ہیڈن کو پاکستان کرکٹ بورڈ نے حالیہ ٹی20 ورلڈ کپ کے لیے ٹیم کا کوچ بنایا تھا۔
وجاہت کاظمی نامی صارف نے لکھا کہ ’جب وہ گیند کراتے ہیں تو لوگ انہیں کھیل نہیں پاتے، جب وہ بیٹنگ کرتے ہیں تو لوگ انہیں روک نہیں پاتے۔ ملیے شاہین شاہ آفریدی آئی سی سی کرکٹر آف دا ایئر سے۔‘

واضح رہے پاکستان کے لیے سال 2021 میں ہر فارمیٹ کی کرکٹ میں سب سے زیادہ وکٹیں لینے والے شاہین شاہ آفریدی کو آئی سی سی کی طرف سے ’کرکٹر آف دا ایئر‘ کا اعزاز دیا گیا تھا۔
انہوں نے گزشتہ سال 36 انٹرنیشنل میچ کھیل کر 78 وکٹیں حاصل کیں۔

شیئر: