عرب گلوکارہ کی جدید خطاطی والی ٹی شرٹس کی تشہیری مہم

یمن نژاد اماراتی گلوکارہ بلقیس فتحی کی موسیقی سے متاثر ہوکر چین کی کمپنی نے مشرق وسطیٰ کے لیے مخصوص انداز کی ٹی شرٹس آن لائن فروخت کے لیے پیش کی ہیں۔

عرب نیوز کے مطابق گلوکارہ نے پانچ مخصوص انداز کی ٹی شرٹس کی نمائش میں حصہ لیا ہے۔ ٹی شرٹس پر جدید خطاطی کے نمونے نقش کئے گئے ہیں۔

مخصوص انداز کی ٹی شرٹس کے اشتہار سے ہونے والی آمدنی کا بیشتر حصہ مقدس مہینے میں ضرورت مندوں میں تقسیم کر دیا جائے گا۔

اشتہاری مہم کے بعد کمپنی کو وصول ہونے والا منافع 9 اپریل کو امارات میں ہلال احمر اور سند چلڈرن کینسرسپورٹ ایسوسی ایشن جیسی تنظیموں کو بھیج دیا جائے گا۔

بلقیس فتحی نے حالیہ ہفتوں میں انسٹاگرام کے ذریعے اپنے 13ملین فالورز کے ساتھ یہ اشتہاری ویڈیو شیئر کی ہے۔

گلوکارہ نے اپنے مداحوں کو ایسی ٹی شرٹس آن لائن خریدنے کے لیے ویب سائٹ سے رابطہ کرنے کا پیغام دیا ہے۔

متحدہ عرب امارات میں رہائش پذیر یمن سے تعلق رکھنے والے والدین کے ہاں پیدا ہونے والی بلقیس فتحی کو 2013 میں اپنی مخصوص گلوکاری کی وجہ سے شہرت حاصل ہوئی تھی۔ انہوں نے اپنے والد احمد جو موسیقار ہیں ان سے موسیقی کی ترتیب حاصل کی ہے۔

گلوکارہ بلقیس فتحی کی شخصیت اور مقبولیت نے انہیں اپنے شناخت کے ساتھ ساتھ  ایک رول ماڈل بننے میں بھی مدد کی ہے۔

اماراتی گلوکارہ نے موسیقی کے اپنے کیریئر کے دوران  بہت سے خیراتی اداروں کے ساتھ کام کیا ہے اور خواتین کے حقوق کی مستقل وکیل بھی رہی ہیں۔

اپنے فلاحی کاموں کے آغاز میں گلوکارہ نے جبوتی میں یمنی پناہ گزین کیمپوں کا دورہ بھی کیا۔ 2016 میں انہیں مشرق وسطیٰ میں خواتین کے حقوق کے لیے اقوام متحدہ کی چیمپئن نامزد کیا گیا تھا۔