حکومت کا ایک بار پھر پیٹرول کی قیمت نہ بڑھانے کا فیصلہ

وفاقی وزیر خزانہ مفتاح اسماعیل نے کہا ہے کہ وزیراعظم شہباز شریف نے عوام پر مزید بوجھ ڈالنے سے انکار کیا ہے اور حکومت پیٹرولیم مصنوعات کی قیمتوں میں اضافہ نہیں کرے گی۔

اتوار کو اسلام آباد میں پریس کانفرنس کرتے ہوئے وزیر خزانہ کا کہنا تھا کہ ’بہت مہنگائی ہو گئی اور اگر پیٹرول اور ڈیزل مہنگا ہوگا تو اور مہنگائی ہوگی۔‘

 ان کا کہنا تھا کہ ’میں آئی ایم ایف سے بات چیت کے لیے جا رہا ہوں اور جلد اس کا کوئی حل نکالیں گے۔‘

وزیر خزانہ کا کہنا تھا کہ سابق وزیر خزانہ شوکت ترین نے عالمی مالیاتی فنڈ (آئی ایم ایف) سے وعدہ کیا تھا کہ ہم پیٹرولیم مصنوعات پر سبسڈی ختم کریں گے، ہم آئی ایم سے مذاکرات کریں گے اور معاملات کو خوش اسلوبی سے حل کریں گے۔

انہوں نے کہا کہ مستقبل میں پیٹرولیم مصنوعات کی قیمتوں کو کہیں نہ کہیں ایڈجسٹ کیا جائے گا۔

مفتاح اسماعیل کا کہنا تھا کہ ’ابھی سے بتا رہا ہوں کہ لوگ گرمی میں پیٹرول لینے کے لیے لائنوں میں نہ لگیں۔ ہم عوام کی خدمت کے لیے آئے ہیں اور اس کے لیے کوشاں ہیں۔‘

پریس کانفرنس کے بعد وزیر خزانہ نے ایک ٹویٹ میں کہا کہ ’میں جو بات پریس کانفرنس میں کہی ہے اسے واضح کر دوں کہ حکومت آج پیٹرولیم مصنوعات کی قیمتیں نہیں بڑھائے گی، لیکن بین الاقوامی آئل پرائسس اور بدلتے حالات کو سامنے رکھتے ہو سکتا ہے ہمیں اپنے فیصلے پر نظر ثانی کرنی پڑے۔‘

دوسری طرف تحریک انصاف کے رہنما حماد اظہر نے حکومت کے اس فیصلے پر تنقید کرتے ہوئے کہا کہ ’ایک جانب یہ کہتے ہیں کہ عمران خان تیل کی قیمتیں نہ بڑھا کر ظلم کیا۔ دوسری طرف کہتے ہیں کہ ہم بھی نہیں بڑھائیں گے۔ شاید بعد میں بڑھا دیں۔‘

ان کا کہنا تھا کہ ’جس طرح یہ معیشت چلا رہے ہیں اس طرح تو کریانے کی دوکان بھی نہیں چلتی۔‘

معاشی بحران دن بدن خطرناک ہوتا جا رہا ہے: اسد عمر

دوسری جانب پاکستان تحریک انصاف کے رہنما اور سابق وفاقی وزیر اسد عمر کا کہنا ہے کہ ملک میں معاشی بحران دن بدن خطرناک ہوتا جا رہا ہے۔

ٹوئٹر پر جاری ایک بیان میں اسد عمر نے کہا کہ ملک کے معاشی حالات روز بروز خطرناک ہوتے جا رہے ہیں اور فیصلہ سازی منجمد ہے۔’

مفتاح اسماعیل شہباز شریف کو دیکھ رہے ہیں، شہباز شریف اسحاق ڈار کو دیکھ رہے ہیں، اسحاق ڈار نواز شریف کو دیکھ رہے ہیں اور نواز شریف آصف زرداری کو دیکھ رہے ہیں، آصف علی زرداری پتا نہیں کسے دیکھ رہے ہیں۔ عوام میں غم اب غصے میں بدلتا جا رہا ہے اور وقت ختم ہوتا جا رہا ہے۔‘