سعودی عرب اور اردن کے درمیان بجلی نیٹ ورک کے لیے ٹینڈر کی تاریخ میں توسیع
ٹینڈر کی آخری تاریخ کو جولائی کے آخرتک بڑھا دیا ہے(فوٹو ٹوئٹر)
مڈل ایسٹ بزنس انٹیلی جنس نے اپنی رپورٹ میں کہا ہے کہ سعودی الیکٹرسٹی کمپنی نے سعودی عرب اور اردن کے درمیان بجلی کے انٹرکنکشن نیٹ ورک کی تعمیر کے معاہدے کے لیے ٹینڈر کی آخری تاریخ کو جولائی کے آخرتک بڑھا دیا ہے۔
رپورٹ میں مزید کہا گیا ہے کہ کم از کم تین ٹیموں کے بارے میں سمجھا جاتا ہے کہ وہ کنٹریکٹ کے لیے بولی لگانےکے لیے اہل ہیں۔
عرب نیوز کے مطابق سعودی الیکٹرسٹی کمپنی نے فروری میں معاہدے کے لیے تجاویز کی درخواست کو یکم مارچ کے ساتھ ابتدائی جمع کرانے کی تاریخ کے طور پر جاری کیا جسے بعد میں مئی کے آخر اور اب جولائی کے آخر تک بڑھا دیا گیا۔
ایک اندازے کے مطابق مجوزہ پاور لنک سے دونوں ممالک کے درمیان روزانہ 500 میگاواٹ بجلی کا تبادلہ متوقع ہے جس کے بعد 1,000 میگاواٹ تک بڑھنے کی امید ہے۔
منصوبے میں ایک ہائی وولٹیج ڈائریکٹ کرنٹ کنورٹر سٹیشن، 400 کلو وولٹ گیس سے چلنے والا سوئچ گیئر سب سٹیشن اور400 کلو وولٹ کی اوور ہیڈ ٹرانسمیشن لائن کی تعمیر شامل ہے۔
یہ منصوبہ اگست 2020 میں سعودی عرب اور اردن کے وزرائے توانائی کے درمیان بجلی کے تعاون کو فروغ دینے کے لیے دستخط کیے گئے مفاہمت کی یادداشت کے نتیجے میں سامنے آیا ہے۔
مڈل ایسٹ بزنس انٹیلی جنس نے کہا ہے کہ سعودی الیکٹرسٹی کمپنی اور اردن کی نیشنل الیکٹرک پاور کمپنی مفصل پراجیکٹ معاہدوں کو مفاہمت نامے کے فریم ورک کے اندر تیار اور نافذ کرے گی۔
سعودی وزیر توانائی عبدالعزیز بن سلمان نے کہا تھا کہ یہ منصوبہ ’بجلی کی تجارت کے لیے علاقائی مارکیٹ کو وسعت دے گا۔‘
سعودی عرب پہلے ہی اسی طرح کے ایک منصوبے میں حصہ لے چکا ہے جس میں عراق اور جی سی سی انٹر کنکشن لنک ہے۔
مملکت نے سعودی عرب اور مصر کے درمیان روزانہ 3000 میگا واٹ بجلی کا تبادلہ کرنے کے لیے دسمبر میں ہائی وولٹیج ڈائریکٹ کرنٹ نیٹ ورک کی تعمیر کے لیے 1.8 بلین ڈالر کے معاہدے کیے۔
