’یہ وقت بھی گزر جائے گا‘ آؤٹ آف فارم کوہلی کو بابر اعظم کا پیغام

انڈین کرکٹر ویراٹ کوہلی کافی عرصے سے آؤٹ آف فارم ہیں جس سے وہ خود بھی پریشان ہیں ان پر تنقید بھی ہو رہی ہے جبکہ ایسے مداحوں کی بھی کمی نہیں جو ان کا حوصلہ بڑھانے کی کوشش کرتے ہیں۔

ایسے حالات میں ’حوصلہ افزائی‘ کے ایک پیغام کو سوشل میڈیا پر خصوصی اہمیت حاصل ہو رہی ہے کیونکہ وہ کسی عام صارف نے نہیں بلکہ پاکستان کرکٹ ٹیم کے کپتان بابر اعظم نے بھیجا ہے۔

جمعرات کو بابر اعظم نے ٹوئٹر پر ویراٹ کوہلی کو مخاطب کرتے ہوئے لکھا ’ہمت کریں، یہ وقت بھی گزر جائے گا۔‘

پاکستانی کپتان کے اس پیغام کو صارفین کی جانب سے سراہا جا رہا ہے جبکہ کچھ صارفین نے دونوں کرکٹرز کے کیریئرز کا موازنہ بھی شروع کر دیا۔

عام طور پر بابراعظم کا موازنہ ویراٹ کوہلی سے کیا جاتا ہے اور ہر میچ کے بعد دونوں کی سینچریوں اور مجموعی سکور کا تقابل کیا جاتا ہے۔

بابر اعظم اس وقت ون ڈے اور ٹی 20 کرکٹ میں پہلے نمبر پر ہیں جبکہ ویراٹ کوہلی ون ڈے کرکٹ میں تیسرے نمبر پر اور ٹی 20 میں ٹاپ ٹین میں موجود نہیں ہیں۔

اسی طرح بابر اعظم ٹیسٹ کرکٹ میں چوتھے نمبر پر براجمان ہیں جبکہ ویراٹ کوہلی ٹیسٹ کرکٹ کی رینکنگ میں بھی ٹاپ ٹین سے باہر ہیں۔

ویراٹ کوہلی نے آخری مرتبہ سینچری 2019 میں بنگلہ دیش کے خلاف ٹیسٹ میچ میں بنائی تھی۔

دوسری جانب بابر اعظم کو دنیا کا بہترین بیٹر قرار دیا جا رہا ہے۔

بابر اعظم نے 40 ٹیسٹ میچز میں 6 سینچریاں سکور کیں جبکہ ان کے کل رنز کی تعداد 2851 ہے اور اوسط 45.98 ہے۔

اسی طرح ون ڈے میں بابر اعظم نے 89 میچز کھیل کر 17 سینچریاں سکور کر رکھی ہیں جبکہ ون ڈے میں ان کے کل رنز 4442 ہیں اور اوسط 59 ہے۔

ٹی 20 میں 74 میچز کھیل کر بابر اعظم45 کی اوسط کے ساتھ 2686 رنز بنا چکے ہیں جبکہ ان کی ٹی 20 میں صرف ایک ہی سینچری ہے۔

بابر اعظم کے ویراٹ کوہلی کے بارے میں اس ٹویٹ کے بعد ٹوئٹر پر صارفین بھی تبصرے کر رہے ہیں۔

انڈین صحافی وکرانت گپتا کہتے ہیں کہ 'بابر آپ ایک ہیرو ہو'

کے ایچ ثاقب نامی ایک صارف نے لکھا کہ 'ایشیا کے دو عظیم بیٹرز'

طحٰہ نامی ایک صارف لکھتے ہیں کہ 'بابر اعظم سب کے دلوں میں اپنا گھر کررہے ہیں۔‘

ایک اور صارف نے لکھا ہے کہ 'آپ کے لیے بہت ہی عزت، ہمارے بادشاہ کے ساتھ برے وقت میں کھڑا ہونے کا شکریہ‘ بابر اعظم آپ سے بہت پیار ہے، خدا کرے آپ بہت سی کامیابیاں حاصل کریں'۔