بابر اعظم اور شاہین آفریدی کی ٹیسٹ رینکنگ میں ترقی، نیا زمانہ، بابر اعظم بہترین

انٹرنیشنل کرکٹ کونسل (آئی سی سی) کی ویب سائٹ کے مطابق ٹیسٹ کرکٹ کی رینکنگ میں تبدیلی کی گئی ہے جس کے بعد بابر اعظم ٹیسٹ بیٹرز کی رینکنگ میں چوتھے سے تیسرے نمبر پر آگئے ہیں۔
اسی طرح فاسٹ بولر شاہین شاہ آفریدی بھی بولرز کی رینکنگ میں چوتھی سے تیسری پوزیشن پر آگئے ہیں۔

بابر اعظم پاکستان اور سری لنکا کے درمیان جاری ٹیسٹ سیریز میں عمدہ کارکردگی دکھانے کے بعد آسٹریلوی بیٹر سٹیو سمتھ کو پیچھے دھکیلتے ہوئے تیسرے نمبر پر آئے ہیں جبکہ شاہین شاہ آفریدی نے انڈین بولر جسپریت بمراہ کی جگہ لی ہے۔
پاکستانی کپتان بابر اعظم ون ڈے میں پہلے نمبر پر موجود ہیں جبکہ ٹی20 میں بھی بابر اعظم کا پہلا نمبر ہے۔
ان کے علاوہ ون ڈے کرکٹ کی رینکنگ میں امام الحق دوسرے جبکہ بولرز کی رینکنگ میں شاہین شاہ آفریدی تیسرے نمبر پر ہیں۔
پاکستان کے وکٹ کیپر بیٹر محمد رضوان ٹی20 رینکنگ میں کپتان بابر اعظم کے ساتھ دوسرے نمبر پر موجود ہیں۔
بابر اعظم اور شاہین شاہ آفریدی کی ٹیسٹ رینکنگ میں ترقی پر سماجی رابطوں کی ویب سائٹ ٹوئٹر پر بھی تبصرے دیکھنے میں آرہے ہیں۔
اذلان نامی ایک صارف لکھتے ہیں کہ ’بابر اعظم کو تمام فارمیٹ کا نمبر ون کھلاڑی بنتے دیکھنے کا خواب کچھ ماہ بعد پورا ہونے والا ہے۔‘

شجاع نامی ایک صارف نے کہا ہے کہ ’خواتین و حضرات، آپ کے سامنے آرہے ہیں آئی سی سی کے نئے ورلڈ نمبر تین بولر جناب شاہین شاہ آفریدی۔‘

عاقب نامی ایک صارف نے لکھا کہ ’کیا ہمیں جھکنا چاہیے؟ بالکل یہ ایک بادشاہ ہے، نیا زمانہ، بابر اعظم بہترین۔‘

مسکان نامی ایک صارف کہتی ہیں کہ ’نمبر تین کے بولر اور بیٹر ایک تصویر میں۔‘

اذان نامی ایک صارف لکھتے ہیں کہ ’مجھے نہیں معلوم ہمیں کب احساس ہوگا کہ ہم بطور قوم کتنے خوش قسمت ہیں کہ بابر اعظم ہماری ٹیم میں ہیں۔‘