عالیہ بھٹ کا مذاق اُڑانے پر رنبیر کپور نے معافی مانگ لی

انڈین اداکار رنبیر کپور نے اپنی اہلیہ عالیہ بھٹ کے حمل کے متعلق مذاق اُڑانے پر معافی مانگ لی ہے۔

انڈین میڈیا ویب سائٹ نیوز 18 کے مطابق رنبیر کپور نے انڈین شہر چنئی میں اپنی آنے والی فلم ’براہمسترا‘ کی تشہیر کے دوران پریس کانفرنس میں اپنی اہلیہ عالیہ بھٹ کے جسم کے بارے میں مذاق کرنے پر معافی مانگ لی ہے۔

رنبیر کپور نے کہا ہے کہ ’پہلے تو یہ کہ میں اپنی اہلیہ سے بہت پیار کرتا ہوں۔ یہ ایک مذاق تھا جو شاید مزاحیہ نہیں بن سکا۔ میری یہ نیت نہیں تھی۔‘

’میں اس کے بارے میں عالیہ سے بعد میں بات کی تھی جس پر وہ بھی ہنس پڑی۔ میری مزاح کی حس بہت بری ہے جس کی وجہ سے مجھے منہ کی کھانی پڑتی ہے۔ میں ان سب سے معافی مانگتا ہوں جن کی دل آزاری ہوئی ہے۔‘

خیال رہے کہ چند روز قبل سوشل میڈیا پر ایک ویڈیو وائرل ہوئی تھی جس میں عالیہ بھٹ اور رنبیر کپور انٹرویو دے رہے تھے۔
انٹرویو کے دوران عالیہ بھٹ فلم ’براہمسترا‘ کی تشہیر کے بارے میں کہہ رہی تھیں کہ ’ہم کریں گے تشہیر، ایسا کچھ نہیں ہے، لیکن اگر آپ یہ پوچھ رہے ہیں کہ ہم ہر طرف پھیلوڈ یعنی پھیلے ہوئے کیوں نہیں ہیں۔‘
عالیہ ابھی بات کر ہی رہی تھیں کہ رنبیر نے بات کاٹتے ہوئے عالیہ بھٹ کے پیٹ کی جانب دیکھ کر کہا کہ ’تاہم میں دیکھ سکتا ہوں کہ کوئی اور پھیلوڈ ہورہا ہے۔‘

رنبیر کپور کے اس مذاق پر سماجی رابطوں کی ویب سائٹ ٹوئٹر پر انہیں شدید تنقید کا نشانہ بنایا گیا اور صارفین کی جانب سے ان پر باڈی شیمنگ کا الزام لگایا جارہا ہے۔
اسی سلسلے میں لاناز چائلڈ نامی ایک صارف کہتی ہیں کہ ’جو آدمی آپ کے بارے میں مذاق اور آپ کی کمزوریاں اجنبی لوگوں کے سامنے بیان کرنے سے نہیں کتراتا، وہ آپ کی خود اعتمادی کو خراب کرے گا اور زندگی کو بھی، یہ مذاق نہیں ہے۔ یہ کوئی کھیل نہیں ہے، یہ بہت بُری چیز ہے اور آپ کو اس کے چہرے سے دیکھ کر اندازہ ہورہا ہوگا۔‘

ڈراکیسس نے لکھا کہ ’مجھے سمجھ نہیں آرہی کہ لوگ کیوں حیران ہورہے ہیں، ہم سب جانتے ہیں کہ رنبیر نے اپنی سابقہ پارٹنرز کا کیسا مذاق اُڑایا ہے۔‘
 

پَریا لکھتی ہیں کہ ’مجھے عالیہ پسند نہیں لیکن یہ بہت بُری حرکت تھی۔ جب باقی ساتھی فنکار عالیہ کو مذاق میں موٹی کہتے تھے تو عالیہ روتی تھیں اور ان کی بہن کا بھی موٹاپے کے باعث مذاق اُڑایا جاتا تھا۔‘