’وفاق پر چڑھائی کو روکنا صوبائی حکومتوں کی آئینی ذمہ داری ہے‘

وفاقی وزیر داخلہ رانا ثنا اللہ نے کہا ہے کہ سیاسی جماعت (پی ٹی آئی) کی طرف سے وفاق پر چڑھائی کو روکنا صوبائی حکومتوں کی آئینی ذمہ داری ہے۔

منگل کو پی ٹی آئی کے ممکنہ لانگ مارچ کے حوالے سے وفاقی وزیر داخلہ رانا ثنا اللہ کی صدارت میں وزارت داخلہ میں اہم اجلاس ہوا جس میں اسلام آباد سمیت چاروں صوبوں کے آئی جیز و چیف سیکرٹریز  نے شرکت کی۔

اجلاس کے بعد وزارت داخلہ کی جانب سے جاری ہونے والے بیان کے مطابق اجلاس کے شرکا نے وفاق پر ممکنہ حملے کی صورت میں آئین اور قانون کی مکمل پاسداری کرنے کی یقین دہانی کروائی۔

وزیر داخلہ نے کہا کہ ’سیاسی جماعت کی طرف سے وفاق پر چڑھائی کے غیرقانونی اقدام کو روکنا صوبائی حکومتوں کی آئینی ذمہ داری ہے۔ چاروں صوبوں، گللگت بلتستان اور آزاد کشمیر کے آئی جیز و چیف سیکرٹریز آئین و قانون کی پاسداری کو یقینی بنائیں۔‘

ان کا کہنا تھا کہ ’کسی سیاسی جماعت، گروہ یا مسلح جتھے کو وفاق پر حملہ آور ہونے کی اجازت نہیں دی جا سکتی۔ ریاست کو کسی گروہ یا مسلح جتھے کے ہاتھوں یرغمال نہیں بننے دیں گے۔‘

’وفاق اور اس کی اکائیاں مل کر ایسے غیر آئینی اقدامات کو روکنے کی پیش بندی کریں گے۔ کسی سیاسی گروہ یا جماعت کو وفاق پر حملہ کر کے ریاست کو مفلوج کرنے کی اجازت نہیں دے سکتے۔‘

رانا ثنا اللہ نے کہا کہ پاکستان ایک ذمہ دار ریاست ہے۔ ایسی کسی بھی روایت کی اجازت نہیں دی جا سکتی۔ چیف سیکریٹریز یقینی بنائیں کہ کوئی سرکاری ملازم وفاق پر چڑھائی کے کسی اقدام یا منصوبے کا حصہ نہ بنے۔

’کسی بھی جارحیت کے خلاف ریاست کو تحفظ فراہم کرنا سرکاری ملازمین کا فریضہ ہے۔ جو سرکاری ملازمین 25 مئی کے لانگ مارچ میں شریک ہوئے ان پر وفاق کو گہری تشویش ہے۔‘

وزیر داخلہ کا مزید کہنا تھا کہ وفاقی حکومت کی طرف سے ڈیمانڈ کیے گئے وسائل اور نفری فراہم کی جائے۔