خروج وعودہ پر واپسی میں تاخیر، اقامہ کینسل ہونے پر کیا کریں؟

سعودی عرب میں مقیم غیرملکیوں کے رہائشی پرمٹ ’اقامے‘ کا اجرا اورتجدید کے علاوہ خروج وعودہ اورخروج نہائی یعنی ایگزٹ ری انٹری اور فائنل ایگزٹ کے معاملات محکمہ جوازات کی ذمہ داری ہے۔

خروج وعودہ کی ابتدائی فیس 200 ریال ہوتی ہے جس کی مدت دو ماہ ہے۔ بعدازاں ہراضافی مہینے کے لیے 100 ریال فیس مقرر ہے۔

اردو نیوز کا فیس بک پیج لائک کریں

جوازات کے ٹوئٹرپرایک شخص نے دریافت کیا کہ ’ہنگامی حالت میں خروج وعودہ پرگیا تھا واپسی میں معمولی سی تاخیر ہونے پرکفیل نے اقامہ کینسل کردیا۔ اب کیا کرسکتا ہوں؟‘

سوال کا جواب دیتے ہوئے جوازات کا کہنا تھا کہ’ کسی بھی حالت میں خروج وعودہ پرجانے والے اگرمقررہ وقت پرواپس نہ آئیں اور ان کا اقامہ جوازات کے سسٹم میں کینسل کردیاجائے تو اس صورت میں ان پرخروج وعودہ کی خلاف ورزی درج کرلی جاتی ہے‘۔ 

ایسے افراد جن کے خلاف خروج وعودہ کی خلاف ورزی ’خرج ولم یعد‘ درج ہوجاتی ہے ان پرمملکت آنے پرتین برس کےلیے پابندی عائد کردی جاتی ہے۔ 

پابندی عائد ہونے کے بعد ان افراد کو کسی بھی دوسرے ویزے پرمملکت آنے کی اجازت نہیں ہوتی ۔ پابندی کے تین برس مکمل ہونے کے بعد وہ کسی بھی دوسرے ویزے پرمملکت آسکتے ہیں۔ 

جن افراد پرخروج وعودہ کی پابندی عائد ہوتی ہے وہ اگرممنوعہ مدت کے دوران مملکت آنا چاہئیں تو انہیں چاہئے کہ وہ اپنے سابق کفیل کی جانب سے جاری کرائے گئے نئے ویزے پرمملکت آسکتے ہیں اس کے علاوہ انہیں سعودی عرب آنے کی اجازت نہیں ہوتی۔ 

واضح رہے جوازات کے سسٹم میں تمام افراد کا ڈیٹا محفوظ ہوتا ہے۔ جن پرپابندی عائد کی جاتی ہے انکا ڈیٹا امیگریشن اداروں کے سسٹم میں فیڈ کردیاجاتا ہے۔ 

سعودی عرب کے ہوائی اڈوں اورسرحدی چوکیوں پرامیگریشن کے سسٹم میں غیرملکیوں کا ڈیٹا فیڈ ہوتا ہے۔ اگرکوئی کسی طرح ویزہ حاصل کرکے مملکت آتا ہے تو سسٹم میں موجود فنگرپرنٹ اورآنکھوں کے عکس کے ذریعے انکی شناخت کرکے انہیں واپس لوٹا دیاجاتا ہے۔ 

 ایک شخص نے جوازات سے استفسار کیا کہ ’اقامے میں میرا پیشہ گھریلوڈرائیورکا ہے، میری اہلیہ اورایک بچہ بھی میرے اقامے میں درج ہے۔ اقامہ کی تجدید کے حوالے سے معلوم کرنا ہے کہ کیا اقامہ کی تجدید تین ماہ کےلیے کرائی جاسکتی ہے کیونکہ اہلیہ اوربچے کے لیے ایک برس کی فیس یکمشت ادا کرنا مشکل ہے؟‘ 

سوال کے جواب میں جوازات کا کہنا تھا کہ’ اقامہ کی مرحلہ وارتجدید کی سہولت گھریلو کارکنوں کو حاصل نہیں۔ یہ سہولت کمرشل کارکنوں کے لیے فراہم کی گئی ہے‘۔ 

واضح رہے گزشتہ برس کے اختتام پرسعودی وزارت داخلہ کی جانب سے مملکت میں رہنے والے کمرشل کارکنوں کے اقاموں کی تجدید کےلیے یہ سہولت فراہم کی گئی تھی کہ وہ اپنے اقامہ سہہ ماہی بنیاد پرتجدید کراسکتے ہیں۔ 

اقاموں کی تجدید میں فراہم کی جانے والی سہولت سے ان تارکین کو کافی فائدہ ہوتاہے جو اپنے اہل خانہ کے ہمراہ مملکت میں مقیم ہیں۔ 

اردو نیوز کا یوٹیوب چینل سبسکرائب کریں

قوانین کے مطابق غیرملکیوں کے اہل خانہ کے اقامہ کی تجدید کےلیے ماہانہ بنیاد پرفیس عائد کی جاتی ہے جو امسال 400 ریال فی فرد ہے اس حوالے سے فیس جمع کرانے کے بعد ہی اقامہ تجدید کیاجاتاہے۔ 

 سہ ماہی فیس کی سہولت سے قبل تمام تارکین کے لیے لازمی ہوتا تھا کہ وہ اپنے اہل خانہ کے اقاموں کی سالانہ بنیاد پرفیس جمع کرائیں جس کے بعد ہی ان کے اقامے تجدید کرائے جاسکتے تھے تاہم موجودہ سہ ماہی سہولت فراہم کیے جانے کے بعد اب یہ ممکن ہوگیا ہے کہ فیملی فیس بھی 3، 6، 9 یا 12 ماہ کی جمع کرائی جاسکتی ہے۔