’گھر واپسی کا شاندار احساس پرانا نہیں ہوتا،‘ ملالہ یوسفزئی پاکستان پہنچ گئیں

نوبیل انعام یافتہ ملالہ یوسفزئی اپنے شوہر اور والدین کے ہمراہ پاکستان پہنچ گئیں۔

منگل کو ملالہ یوسفزئی نے ایک ٹویٹ کے ذریعے اپنے لاہور پہنچنے کی اطلاع سوشل میڈیا صارفین تک پہنچائی۔

اپنے شوہر اور والدین کے ہمراہ تصاویر شیئر کرتے ہوئے ملالہ یوسفزئی کا کہنا تھا کہ ’اپنے گھر پاکستان واپسی پر جو شاندار احساس ہوتا ہے وہ کبھی بھی پرانا نہیں ہوتا۔‘

انہوں نے یہ بھی لکھا کہ لاہور پہنچنے پر بہت پرجوش ہیں۔

اس سے قبل ملالہ یوسفزئی رواں سال اکتوبر کے مہینے میں بھی والدین کے ہمراہ پاکستان کے ساحلی شہر کراچی پہنچی تھیں جس کے بعد انہوں نے ملک کے سیلاب سے متاثر ہونے والے علاقوں کا دورہ بھی کیا تھا۔

ملالہ یوسفزئی پر تقریباً 10 سال قبل نو اکتوبر کو سوات میں اس وقت حملہ ہوا تھا جب وہ سکول جا رہی تھیں۔ اس حملے میں وہ شدید زخمی ہوئی تھیں اور انہیں نشانہ بنانے کی ذمہ داری کالعدم تحریک طالبان پاکستان (ٹی ٹی پی) نے قبول کی تھی۔

اس کے کچھ عرصے بعد ملالہ یوسفزئی کو علاج کے لیے بیرون ملک منتقل کر دیا گیا تھا۔

اپنے اوپر ہونے حملے کے بعد یہ ملالہ یوسفزئی کا پاکستان کا تیسرا دورہ ہے۔

حملے کے بعد بین الاقوامی سطح پر ملالہ یوسفزئی طالبان کے خلاف مزاحمت کی علامت کے طور پر سامنے آئیں اور 2014 میں ان کو امن کے نوبیل انعام سے نوازا گیا تھا۔