ناگپور ٹیسٹ: ’روہت شرما بیٹنگ کی آن لائن کلاس دے رہے ہیں‘

انڈیا کے شہر ناگپور میں جاری ’بارڈر گواسکر ٹرافی‘ کے پہلے ٹیسٹ میچ میں انڈین کپتان روہت شرما نے سینچری اننگز کھیلی تو مشکل حالات میں عمدہ بیٹنگ کرنے پر انہیں خوب سراہا گیا ہے۔

روہت شرما 212 گیندوں پر 120 رنز بناکر پیٹ کمنز کی گیند پر آؤٹ ہوئے، یہ بحیثیت انڈین کپتان ان کی پہلی ٹیسٹ سینچری ہے۔

اس سے قبل آسٹریلیا کی ٹیم اپنی پہلی اننگز میں صرف 177 رنز بنا کر آؤٹ ہوگئی تھی۔

انڈین کھلاڑیوں کے لیے بھی ناگپور کی پچ پر بیٹنگ کرنا مشکل نظر آرہا تھا، روہت شرما اور رویندر جڈیجہ کے علاوہ کوئی بھی بیٹر لمبی انفرادی اننگز نہیں کھیل سکا۔

اب سے کچھ دیر پہلے تک انڈیا نے سات وکٹیں کھو کر 300 سے زائد رنز بنالیے تھے۔

ناگپور کی مشکل پچ پر انڈین ٹیم کی ریت کی دیوار کی طرح گرتی بیٹنگ لائن کو سہارا دینے پر متعدد افراد نے روہت شرما کی کارکردگی کو سراہا تو ان کی اننگز کی تعریف کی۔

سابق انڈین مڈل آرڈر بیٹر محمد کیف نے ایک ٹویٹ میں لکھا کہ ’روہت شرما بیٹنگ کی آن لائن کلاس دے رہے ہیں۔ تمام جونیئر کرکٹرز دیکھیں۔‘

سابق انڈین فاسٹ بولر مناف پٹیل نے لکھا کہ ’یہ سینچری دیکھنے کے لیے آنکھیں ترس گئیں تھیں۔‘

اس سینچری کے ساتھ روہت شرما وہ واحد انڈین کھلاڑی بن گئے ہیں جنہوں نے بحیثیت کپتان کرکٹ کے تینوں انٹرنیشنل فارمیٹس میں سینچری اننگیز کھیلی ہیں۔

روہت شرما کی اننگز اتنی جاندار تھی کہ آسٹریلین بیٹر سٹیو اسمتھ بھی انڈین کپتان کو سراہتے ہوئے نظر آئے۔ انڈین کرکٹ فینز اس تصویر کو سوشل میڈیا پر شیئر کیے بغیر نہ رہ سکے۔

یہ روہت شرما کے کیریئر کے نویں ٹیسٹ سینچری تھی۔ اس سے پہلے وہ اپنے کیریئر میں 45 ٹیسٹ میچ کھیل چکے ہیں جہاں انہوں نے تین ہزار 137 رنز بنائے ہیں۔