آئی پی ایل فائنل: دھونی کی محبت میں ایک لاکھ سے زائد شائقین کی آمد متوقع

انڈین پریمیئر لیگ کا فائنل دنیا کے سب سے بڑے کرکٹ سٹیڈیم میں منعقد ہونے جا رہا ہے جو شاید سپر سٹار اور چنائی سپر کنگز کے کپتان مہندر سنگھ دھونی کا بھی آخری میچ ہو۔

خبر رساں ادارے اے ایف پی کے مطابق اتوار کی شام کو ریاست احمد آباد میں دھونی کی ٹیم چنائی سپر کنگز اور ہاردک پانڈیا کی گجرات ٹائٹنز مدمقابل ہوں گی۔

انڈین پریمیئر لیگ (آئی پی ایل) کا فائنل دیکھنے کے لیے ایک لاکھ سے زائد شائقین کی آمد متوقع ہے۔

جمعے کو آئی پی ایل کے دوسرے کوالیفائر میں دفاعی چیمپیئن گجرات ٹائٹنز نے ممبئی انڈینز کو 62 رنز سے شکست دے کر لیگ کے فائنل میں جگہ بنا لی تھی۔

دوسرے کوالیفائر کا یہ میچ بھی احمد آباد میں ہی کھیلا گیا تھا جب گجرات ٹائٹنز کے اوپننگ بیٹر شبھمن گِل کی سینچری کی بدولت تین وکٹوں کے نقصان پر 233 رنز سکور کیے۔

چنائی کنگز کے لیے کرکٹر ہاردک پانڈیا کی کپتانی اور بیٹسمین شبھمن گل کی موجودگی میں ٹیم گجرات ٹائٹنز کو شکست دینا آسان نہیں ہوگا۔

انڈین کرکٹ ایسوسی ایشن نے اے ایف پی کو بتایا کہ فائنل کے لیے تمام ٹکٹ فروخت ہو چکے ہیں اور سٹیدیم مکمل بھرا ہوا ہوگا۔

ویسے تو جمعے کو ہونے والے میچ میں بھی حکام نے کچھ ایسی ہی توقع کا اظہار کیا تھا لیکن صرف 75 ہزار شائقین میچ دیکھنے آئے جب گجرات ٹائٹنز نے ممبئی انڈین کو ہرایا تھا۔

 فائنل سے ایک دن قبل سنیچر کو سٹیدیم کے باہر شائقین کی بڑی تعداد ٹکٹ خریدنے کے لیے وہاں موجود تھی۔

وہاں موجود ایک سافٹ ویئر انجینیئر سریش بابو نے اے ایف پی کو بتایا کہ وہ چنائی سے سفر کرتے ہوئے ملک کے دوسرے کونے میں آئے ہیں تاکہ مہندر دھونی کو ایک مرتبہ پھر ٹرافی اٹھاتے ہوئے دیکھ سکیں۔

سریش بابو نے کہا ’مجھے معلوم ہے کہ شاید یہ ان (دھونی) کا آخری میچ ہو لیکن ہماری دعا ہے کہ وہ آئندہ سال بھی واپس آئیں۔‘

گجرات ٹائٹنز کو ویسے تو میچز کے دوسرے سیزن میں ہوم گراؤنڈ احمد آباد میں کھیلنے پر بہت زیادہ حمایت حاصل ہوئی تھی لیکن آج کے میچ میں مہندر سنگھ دھونی کی موجودگی کے باعث شائقین منقسم ہو سکتے ہیں۔

کرکٹ ٹی شرٹس بیچنے والے شریف نامی ایک نوجوان نے بتایا کہ گزشتہ سال ہاردک پانڈیا کی جرسی سب سے زیادہ فروخت ہوئی تھی لیکن اس مرتبہ دھونی کی چنائی نمبر 7 کی بھی اتنی ہی ڈیمانڈ ہے۔

ہاردک پانڈیا کی جرسی پہنے ایک فین نے کہا کہ وہ چاہتے ہیں کہ ہاردک ہی آئی پی ایل دوبارہ جیتیں لیکن دھونی کو بھی اپنی مخصوص ہیلی کاپٹر شاٹ مارتے دیکھنا چاہتے ہیں۔

 آئی پی ایل کے جاری ایڈیشن میں اگر کسی ایک کھلاڑی کو سب سے زیادہ عوام سے پیار ملا ہے تو وہ ’کیپٹن کول‘ کے نام سے مشہور انڈیا کے سابق کپتان مہندر سنگھ دھونی ہیں۔

چنائی سپر کنگز کو آئی پی ایل کی تاریخ کی دوسری کامیاب ترین ٹیم کہا جاتا ہے۔

دھونی کی اس ٹیم نے 2010، 2011، 2018 اور 2021 میں کُل چار مرتبہ آئی پی ایل ٹرافی اپنے نام کی۔

خیال رہے چنائی سپر کنگز اور راجستھان رائلز پر میچ فکسنگ اور بیٹںگ کے الزام میں آئی پی ایل میں کھیلنے پر 2016 اور 2017 تک پابندی عائد کی گئی تھی۔

چنائی سپر کنگز پر دو سال کی پابندی کے دوران ایم ایس دھونی نے رائزنگ پونے سپر جائنٹ کی کپتانی کی تھی۔