ساؤتھ ایشین فٹبال چیمپیئن شپ: انڈیا نے پاکستان کو 4-0 سے شکست دے دی

ساؤتھ ایشین فٹبال چیمپین شپ کے ایک میچ میں میزبان انڈیا نے پاکستان کو صفر کے مقابلے میں چار گول سے شکست دے دی ہے۔

بدھ کو بنگلور میں کھیلے جانے والے گروپ اے کے میچ میں پاکستان کے خلاف انڈیا نے چار گول سکور کیے۔ انڈیا کی جانب سے ان کے کپتان سنیل چھیتری نے تین گول کیے جبکہ میچ کا چوتھا گول اودانتا سنگھ نے کیا۔

گروپ ’اے‘ کی دونوں ٹیموں کے درمیان کھیلے جانے والے میچ میں ریفری کی جانب سے انڈین کوچ ایگور اسٹیمک کو پاکستانی کھلاڑیوں سے جارحانہ رویہ اختیار کرنے پر ریڈ کارڈ بھی دکھایا گیا۔

چیمپیئن شپ میں پاکستان، انڈیا، نیپال اور کویت کی ٹیمیں گروپ اے میں شامل ہیں جبکہ گروپ بی میں لبنان، مالدیپ، بھوٹان اور بنگلہ دیش کی ٹیموں کو رکھا گیا ہے۔

ساؤتھ ایشین فٹبال چیمپین شپ میں 24 جون کو پاکستان کا مقابلہ کویت سے ہوگا جبکہ پاکستان 27 جون کو نیپال کا سامنا کرے گا۔