ایشین گیمز میں نیپال کا ٹی 20 کرکٹ میں سب سے زیادہ سکور بنانے کا ریکارڈ

چین میں جاری 19 ویں ایشین گیمز میں کرکٹ کے مقابلوں میں نیپال نے منگولیا کے خلاف ٹی 20 کرکٹ کا سب سے زیادہ سکور بنا کر نیا ورلڈ ریکارڈ قائم کر دیا ہے۔

چینی شہر ہینگزو میں کھیلے گئے میچ میں نیپال نے مقررہ 20 اوورز میں تین وکٹوں کے نقصان پر 314 رنز بنائے۔

نیپال کی جانب سے کوشال مَلا نے 50 گیندوں پر 137 رنز بنائے جس میں انہوں نے منگولیا کے بولروں کو 12 چھکے اور 8 چوکے رسید کیے۔

کوشال مَلا نے انٹرنیشنل کرکٹ میں تیز ترین سینچری بنانے کا ریکارڈ بھی اپنے نام کر لیا ہے۔

انہوں نے منگولیا کے خلاف 34 گیندوں پر سینچری بنائی۔

اُن کے علاوہ کپتان روہت پاؤڈیل نے 27 گیندوں پر 61 جبکہ دِیپندرا سنگھ ایری نے 10 گیندوں پر 52 رنز سکور کیے۔

نیپال نے اپنی اننگز میں مجموعی طور پر 26 چھکے اور 14 چوکے لگائے جبکہ منگو یا کی جانب سے 29 رنز ایکسٹرا دیے گئے۔

315 رنز کے جواب میں منگولیا کی پوری ٹیم صرف 41 رنز بنا کر ڈھیر ہوگئی جس کے بعد نیپال نے یہ میچ 273 رنز کے تاریخی مارجن سے جیت لیا جو ایک ورلڈ ریکارڈ مارجن ہے۔

اس میچ میں نیپال نے ٹی20 کرکٹ کی ایک اننگز میں سب سے زیادہ چھکے کا لگانے کا ریکارڈ بھی اپنے نام کر لیا ہے۔
 

نیپال نے منگولیا کے خلاف 26 چھکے لگائے جس کے بعد افغانستان کا ایک اننگز میں 22 چھکے لگانے کا ریکارڈ بھی ٹوٹ گیا ہے۔

خیال رہے اس سے قبل ٹی20 کرکٹ میں سب سے زیادہ ایک اننگز میں رنز بنانے کا ریکارڈ افغانستان کے پاس تھا جنہوں نے 2019 میں آئرلینڈ کے خلاف تین وکٹوں کے نقصان پر 278 رنز بنائے تھے۔

واضح رہے یہ منگولیا کا انٹرنیشنل کرکٹ میں پہلا میچ تھا۔

اس سے قبل ایشین گیمز کے ویمنز کرکٹ کے مقابلوں میں منگولیا کی ٹیم انڈونیشیا کے خلاف صرف 15 رنز پر ہی ڈھیر ہوگئی تھی۔

منگولیا کی خواتین ٹیم نے اُس میچ میں 38 وائڈ بالز کروائی تھیں جبکہ اُن کی ٹیم کی کئی کھلاڑی پہلی مرتبہ گھاس والی گراؤنڈ پر کوئی بھی کرکٹ میچ کھیلی تھیں۔