ایشین گیمز: پاکستان والی بال ٹیم کے کوچ کیوں رو پڑے؟

چین میں جاری 19 ویں ایشین گیمز میں والی بال کے مقابلے میں قطر نے پاکستان کو ایک کے مقابلے میں تین سیٹس سے شکست دے دی ہے۔

چین کے شہر ہینگزو میں اتوار کو کھیلے گئے والی بال کے اہم میچ میں قطر سے شکست کھانے کے بعد پاکستان ٹیم اب پانچویں پوزیشن کے لیے انڈیا سے مقابلہ کرے گی۔

قطر نے پاکستان کے خلاف مجموعی 99 پوائنٹس سکور کیے جبکہ پاکستان کی ٹیم 86 پوائنٹس سکور کر پائی۔

قطر نے پاکستان کو 24-26، 19-25، 25-23، 18-25 سے شکست دی۔

اس سے قبل ایشین گیمز کے میچ میں پاکستان نے جنوبی کوریا کو صفر کے مقابلے میں تین سیٹس سے شکست دے دی تھی۔

اسی طرح ایونٹ میں اپنے دوسرے میچ میں پاکستان نے میزبان چین کو بھی صفر کے مقابلے میں تین سیٹس سے شکست دی جبکہ اپنے پہلے میچ میں پاکستان نے منگولیا کو بھی صفر کے مقابلے میں تین سیٹس سے زیر کیا۔

جنوبی کوریا کے خلاف جیت پر پاکستان والی بال ٹیم کے کوچ اسانائے رامیرز فیراز اپنے انٹرویو میں جذباتی ہوگئے تھے۔

جنوبی کوریا کے خلاف جیت کے بعد سوشل میڈیا پر اسانائے رامیرز فیراز کی ویڈیو وائرل ہے جس میں خوشی سے آبدیدہ ہوتے دکھائی دے رہے ہیں۔

برازیل سے تعلق رکھنے والے اسانائے رامیرز فیراز ٹیم کی کامیابی پر کھلاڑیوں کی خوب تعریف کرتے نظر آئے۔
 

پاکستان والی بال ٹیم کے کوچ کا کہنا تھا کہ ’اس جیت کا کوئی زاویہ نہیں ہے، آپ کو نہیں پتا کہ یہ لڑکے اس کورٹ میں آنے تک کیا کیا برداشت کر کے آتے ہیں۔ یہ بہت مشکل ہے، بہت مشکل ہے، لیکن ہمیں پتا ہے کہ یہ ممکن ہے۔‘

پاکستان نے جنوبی کوریا کو 19-25، 22-25 اور 25-21 سے تین سیٹس میں شکست دی تھی۔

خیال رہے 2018 میں انڈونیشیا میں کھیلے گئے ایشین گیمز میں پاکستان نے والی بال کے مقابلوں میں آٹھویں پوزیشن حاصل کی تھی۔